Kuwait City,Kuwait - Dowladda Federaalka Soomaaliya ayaa saxiixday heshiis deyn cafin ah oo muhiim ah, oo ay la gashay Sanduuqa Lacagta Carabta, taas oo dib u soo celinaysa wadashaqeyntii hakadka gashay ee labada dhinac u dhaxeysay.
Heshiiskan oo gaaraya $306.5 milyan ayaa waxaa maanta ku saxiixay magaalada Kuwait Wasiirka Maaliyadda Soomaaliya, Biixi Imaan Cige, iyo Agaasimaha Guud ee Sanduuqa Lacagta Carabta, Fuad M. Al-Turki, xilli uu socdo Shirka Sanadlaha ah ee Hay’adaha Maaliyadeed ee Carabta.
Wasaaradda Maaliyaddu waxay sheegtay in heshiiskan uu yahay natiijada wada-xaajood saddex sano socday, isla markaana uu muhiim u yahay dib u dhiska dhaqaalaha dalka iyo fursadaha maalgelinta ee horumarineed.






