Soomaaliya oo sheegtay in la jebiyay AS weerar ku soo qaaday Mubaarak

Muqdisho Dawan) – Dowladda Federaalka Soomaaliya ayaa sheegtay in ciidamadeeda, oo ay taageerayaan ciidamada Uganda ee howlgalka Midowga Afrika, ay jebiyeen weerar ay Al-Shabaab ku qaadday deegaanka Mubaarak ee gobolka Shabeellaha Hoose, iyadoo sheegtay in lagu dilay in ka badan 40 dagaallame.

War-saxaafadeed ka soo baxay Wasaaradda Gaashaandhigga maanta oo Khamiis ah ayaa lagu sheegay in Ciidanka Xoogga Dalka Soomaaliyeed (CXDS), oo kaashanaya ciidamada Uganda ee AUSSOM, ay gaarsiiyeen khasaare culus dagaallamayaasha Al-Shabaab oo isku dayay inay weerar ku qaadaan deegaankaas.

Mas’uuliyiintu waxay sheegeen in howlgaladu weli socdaan si loo sugo amniga loogana hortago weerarro kale.

Mubaarak waa deegaan istiraatiiji ah oo horraantii bishan ay dib u qabsadeen ciidamada Soomaaliya iyo kuwa Midowga Afrika, kaddib howlgal milatari oo ballaaran. Deegaankan iyo Darasalaam ayaa hore loogu adeegsan jiray saldhigyo ay Al-Shabaab ka abaabuli jirtay weerarro ka dhan ah Muqdisho iyo magaalooyin kale, sida ay sheegtayWasaaradda Gaashaandhigga.

Mas’uuliyiintu waxay hore u sheegeen in qabsashada deegaannadan ay qayb ka tahay olole ballaaran oo lagu burburinayo saldhigyada Al-Shabaab ee gobolka Shabeellaha Hoose, halkaas oo kooxda ay ku lahayd xarumo istiraatiiji ah oo dhinaca amniga iyo dhaqaalaha ah.