Soomaaliya oo sheegtay inay duqeyn ku dileen xubno Daacish ah

Muqdisho, Soomaaliya – Dowladda Federaalka Soomaaliya oo kaashanaysa Taliska Ciidamada Mareykanka ee Afrika (AFRICOM) ayaa shalay si wadajir ah u fulisay duqeyn cirka ah oo lagu bartilmaameedsaday xubno ka tirsan kooxda Daacish, kuwaas oo ku sugnanaa gobolka Bari ee Puntland.

Sida lagu sheegay war-saxaafadeed ka soo baxay Wasaaradda Warfaafinta, Dhaqanka iyo Dalxiiska, weerarka ayaa ka dhacay koonfur-bari magaalada Boosaaso, gaar ahaan agagaarka buuraleyda Calmiskad, halkaas oo kooxda Daacish ay ku sugnaayeen. Duqeyntan ayaa ahayd mid si gaar ah u taageereysa hawlgallada Ciidanka Daraawiishta Puntland ee lagu beegsanayo kooxdaasi.

Sida warbaahinta Puntland shaacisay wax yar ka hor Warka Dowladda Soomaaliya ayaa lagu sheegay in dhawaaqa duqeymo si weyn looga maqlay deegaannada ku dhow Togga Miiraale. Dowladda Federaalka ayaa intaa ku dartay in qiimeyn horudhac ah ay muujisay in xubno badan oo Daacish ah la dilay, iyadoo la xaqiijiyay inaysan jirin waxyeello shacabka rayidka ah soo gaartay.

Inkastoo AFRICOM aysan weli si rasmi ah uga hadlin howlgalka, Dowladda Soomaaliya waxay hoosta ka xariiqday inay sii wadi doonto iskaashiga caalamiga ah, gaar ahaan la Taliska AFRICOM, si ay u xoojiso dagaalka ay kula jirto kooxaha Daacish iyo Al-Shabaab, kuwaas oo ay ku sheegtay in khatar weyn ay ku hayaan amniga gudaha iyo gobolka.