New York (Dawan)– Soomaaliya ayaa si rasmi ah ula wareegtay guddoominta wareegga ah ee Golaha Ammaanka ee Qaramada Midoobay bisha Janaayo 2026, taas oo ah tallaabo taariikhi ah markii ugu horreysay muddo 54 sano ah tan iyo 1971–1972.
Wakiilka Joogtada ah ee Soomaaliya u fadhiya Qaramada Midoobay, Abuukar Daahir Cusmaan, ayaa Jimcihii shir jaraa’id ku qabtay xarunta Qaramada Midoobay, isaga oo sheegay in Soomaaliya ay si weyn ugu faraxsan tahay hoggaaminta Golaha Ammaanka, xilli dalku dib ugu soo laabtay hoggaaminta Golaha kadib muddo dheer oo uu ka maqnaa.
Abuukar Daahir Cusmaan ayaa ku tilmaamay guddoomintan mid muujinaysa horumarka diblomaasiyadeed ee Soomaaliya iyo kaalinta ay ka qaadanayso arrimaha nabadda iyo amniga caalamiga ah. “Waxaan rabnaa inaan noqono cod caqli leh, kana shaqeeya dhisidda is-faham, isla markaana dhiirrigeliya heshiisyo waara,” ayuu yiri.
Danjiraha ayaa xusay in Soomaaliya ay mudnaan siin doonto ilaalinta sharciga caalamiga ah, difaaca dadka rayidka ah iyo xallinta khilaafaadka si nabadgelyo ah, isaga oo adkeeyay in dalku uu ka go’an yahay ku shaqeynta mabaadi’da hufnaanta, daahfurnaanta iyo ka-qaybgalka dhammaan xubnaha Golaha.
