Muqdisho – 30 Diseembar 2025 (Dawan)- Dowladda Soomaaliya ayaa xaqiijisay taageerada ay u hayso madax-bannaanida iyo midnimada dhuleed ee Yemen, iyadoo arrintan la xiriirta xiisadaha soo cusboonaaday ee gobolka Khaliijka.
Qoraal kooban oo lagu baahiyay Wakaaladda Wararka Soomaaliyeed ayaa lagu sheegay in Soomaaliya ay adkeyneyso taageerada madax-bannaanida, midnimada dhuleed iyo sharciyadda dowladda Yemen, iyada oo aan la raacin wax faahfaahin dheeraad ah.
Arrintan ayaa kusoo beegmeysa iyada oo Yemen ay kasoo cusboonaadeen xaalado cakiran oo ka dhashay taageerada milatari ee Imaaraadka Carabta uu siiyay xoogagga Koonfurta Yemen, oo kasoo horjeeda dowladda la aqoonsanyahay.
Xukuumadda Yemen ayaa maanta ku dhawaaqday inay joojisay heshiiskii difaaca ee ay la lahayd Imaaraadka Carabta, iyadoo dalbatay in dhammaan ciidamada Imaaraadka ay ka baxaan dhulka Yemen muddo 24 saacadood gudahood. Tallaabadan ayaa timid kadib markii Imaaraadka lagu eedeeyay inay taageero milatari u fidiyeen Ciidamada Guddiga Kala-guurka Koonfurta , taasoo khatar ku noqotay midnimada dalka.
Xiisadaha ka dhashay tallaabada Imaaraadka ayaa sidoo kale sare u qaaday khilaafka u dhexeeya Imaaraadka iyo Sacuudi Carabiya, oo ah hogaamiyaha ugu weyn ee isbahaysiga Khaliijka ee ka hortaga Xuutiyiinta Yemen. Dowladda Sacuudi ayaa si cad ugu sheegtay Imaaraadka in ammaanka qarankeedy uu yahay lama taabtaan , iyadoo dalbatay in ciidamada Imaaraadka laga saaro dalka Yemen.
