Muqdisho – 26 Janaayo 2026 (Dawan)-Ra’iisul Wasaaraha Soomaaliya, Mudane Xamsa Cabdi Barre, ayaa maanta oo Isniin ah dhagax-dhigay xarunta dhexe ee cusub ee Wasaaradda Maaliyadda Dowladda Federaalka Soomaaliya. Mashruucan waxaa taageeraya Bangiga Horumarinta Afrika (AfDB), sida lagu sheegay war rasmi ah oo ka soo baxay dowladda.
Dhismahan cusub ayaa lagu beddeli doonaa xaruntii hore ee wasaaradda oo la dhisay sanadkii 1980-kii, waxaana loogu talagalay in lagu mideeyo dhammaan waaxyaha iyo hoggaanka sare ee wasaaradda, si loo hagaajiyo hannaanka shaqo, loona fududeeyo adeegyada loo fidiyo bulshada, iyadoo sidoo kale la yareynayo ciriiriga ka jiray xafiisyada.
Ra’iisul Wasaare Xamsa Cabdi Barre ayaa sheegay in dhismaha cusub uu wax weyn ka tari doono tayeynta shaqada wasaaradda, isagoo xusay in marka uu mashruucu dhammaado in la heli doono xafiisyo casri ah oo ay ku wada shaqeeyaan dhammaan shaqaalaha iyo madaxda wasaaradda.
“Dhismahan marka uu dhammaado waxa aad yeellan doontaan xafiisyo ay ku howlgali doonaan dhammaan shaqaalaha iyo madaxda wasaaradda, waanna idiinku hambalyeynaya tallaabada wanaagsan ee aad u qaadeen dhanka tayeynta adeegga,” ayuu yiri Ra’iisul Wasaare Xamse
