Muqdisho (Dawan)- Wasiirka Gaashaandhigga Soomaaliya, Axmed Macallin Fiqi, ayaa sheegay in taageerada ay Dowladda Imaaraadka Carabta siin jirtay Soomaaliya in marraka aanay ku imaan jirin waddooyinka rasmiga ah ee dowladda, balse ay xilliyada gaar ay gaartay kooxo hubeysan oo maxalli ah oo ka jira qaar ka mid ah dowlad goboleedyada dalka.
Arrintaas ayuu Wasiirku ku tilmaamay mid lagu wiiqayay awoodda dowladda dhexe isla markaana lagu carqaladeynayay madaxbannaanida qaranka.
"Marka laga hadlayo taageerada Imaaraadku siiyay Soomaaliya, waxaa muhiim ah in la xuso in taageeradaasi aanay mar walba ku iman jirin waddooyinka rasmiga ah ee dowladda, balse mararka qaar loo gudbiyay kooxo hubeysan oo maxalli ah oo ka jira qaar ka mid ah maamullada dalka, taas oo lagu doonayay in lagu wiiqo awoodda dowladda dhexe laguna carqaladeeyo madaxbannaanida iyo midnimada qaranka gudaha" ayuu yiri wasiir Fiqi
Hadalkan ayuu wasiirku ku sheegay wareysi uu siiyay Aljazeera Net, isagoo xusay in dowladda federaalka ay ka go’an tahay ilaalinta midnimada dalka iyo in dhammaan iskaashiyada amni iyo difaacba ay ku socdaan hannaan daahfuran oo hoos yimaada dowladda dhexe.
Wasiirku waxa uu intaas raaciyay in Dowladda Imaaraadka Carabta ay horay u bixisay gargaar ay ku taageeraysay Ciidanka Xoogga Dalka Soomaaliyeed xilliyo hore, kaas oo isugu jiray ka-qayb-qaadasho mushaar-bixin, tababarro ciidan, qalabayn iyo taageero saadka ah, iyo sidoo kale bixinta diyaarado aan duuliye lahayn oo lagu taageerayay howlgallada cirka.
Wasiirku waxa uu xaqiijiyay in taageeradaas ay istaagtay ku dhowaad laba sano ka hor, halka wixii taageero ah ee jiray waayahan dambe ay ahaayeen kuwo aad u kooban.
