Soomaaliyaa oo dunida ka codsatay in laga caawiyo biyo-yaraanta

Soomaaliya, 2 Febraayo 2026 (Dawan) – Shirweynaha Isku-duwidda Tamarta iyo Khayraadka Biyaha ee heer Federaal iyo Dowlad-goboleedyo ayaa Axaddii si rasmi ah loogu soo gabagabeeyay magaalada Dhuusamareeb, kaddib kulan socday laba maalmood, kaas oo uu xiray Wasiirka Wasaaradda Tamarta iyo Khayraadka Biyaha ee Xukuumadda Federaalka Soomaaliya, Cabdullaahi Bidhaan Warsame.

Shirweynahan, oo ay isugu yimaadeen wasiirrada tamarta iyo khayraadka biyaha ee heer federaal iyo dowlad-goboleedyo, ayaa diiradda lagu saaray xoojinta wada-shaqeynta iyo isku-duwidda siyaasadaha tamarta iyo biyaha ee dalka, iyadoo la dejinayo qorshe qaran oo mideysan oo wax looga qabanayo saameynta abaaraha iyo horumarinta adeegyada tamarta iyo biyaha ee bulshada Soomaaliyeed.

Intii uu socday shirku, waxaa la soo bandhigay mashaariic kala duwan oo ay Wasaaradda Tamarta iyo Khayraadka Biyaha ka fulinayso dalka, kuwaas oo ay ka mid yihiin:

Mashruuca Soo-kabashada Korontada Soomaaliya (ILAYS)

Mashruuca Jowhar ee horumarinta biyaha

Mashruuca Barwaaqo+, oo ka socda qeybo kala duwan oo dalka ah, kuna saleysan deris-wanaag iyo iskaashi bulsho

Barnaamijka Abaartire, oo si gaar ah ay u fulinayso Wasaaradda Tamarta iyo Khayraadka Biyaha, looguna talagalay in looga jawaabo saameynta abaaraha isla markaana Soomaaliya mustaqbalka ay yeelato ilo biyo oo la isku halleyn karo.

Wasiirka Tamarta iyo Khayraadka Biyaha ee Galmudug, Axmed-nuur Xaaji Cismaan, ayaa sheegay in ujeeddada ugu weyn ee shirku ay ahayd hagaajinta iyo horumarinta wada-shaqeynta u dhexeysa heerarka kala duwan ee dowladnimo. “Shirkan wuxuu leeyahay muhiimad gaar ah, maadaama uu kusoo beegmay xilli dalka uu wajahayo xaalado adag oo la xiriira abaaro iyo duruufo degdeg ah,” ayuu yiri Axmed-nuur.

Dhankiisa, Wasiirka Tamarta iyo Khayraadka Biyaha ee Xukuumadda Federaalka Soomaaliya, Cabdullaahi Bidhaan Warsame, ayaa sheegay in diiradda la saarayo wax ka qabashada biyo-yaraanta baahsan ee dalka ka jirta, taas oo si gaar ah u saameysay dadka ku nool deegaannada miyiga. Wuxuu xusay in wasaaraddu ay ka go’an tahay in dalka laga hirgeliyo adeegyo koronto iyo biyo oo la isku halleyn karo, isla markaana si caddaalad ah looga fuliyo mashaariicda biyaha iyo ceelasha dalka oo dhan.

“Waxaan beesha caalamka ugu baaqeynaa inay gargaar degdeg ah la soo gaaraan dadka Soomaaliyeed ee ay saameeyeen abaaraha iyo biyo-la’aanta,” ayuu yiri Wasiir Bidhaan.

Wasaaraddu waxay sheegtay in ujeeddada shirkan ay ahayd xoojinta wada-shaqeynta iyo isku-duwidda siyaasadaha tamarta iyo biyaha, si loo helo qorshe qaran oo mideysan, looga jawaabo caqabadaha abaaraha, loona xaqiijiyo helitaanka biyo nadiif ah iyo tamar la awoodi karo, kuwaas oo laf-dhabar u ah horumar waara.

Baaqan ayaa imanaya xilli Soomaaliya ay wajahayso abaaro daran, iyadoo deegaano ka tirsan qaar ka mid ah dowlad-goboleedyada laga soo sheegayo xaalado adag oo la xiriira biyo-la’aan, kuwaas oo sababay khasaare naf iyo mid nololeed.