Maamulka SSC-Khaatumo ayaa si adag uga falceliyey war-saxaafadeed ay 28-kii Maarso 2025 soo saartay Somaliland, kaas oo ay ku dalbatay in dowladda Kenya ay si rasmi ah u aqoonsato iyo in ay ka madaxbannaan yihiin Soomaaliya.
Maamulka SSC-Khaatumo waxa uu ku eedeeyay Somaliland in ay si ula kac ah u sheegtay waxyaabo khaldan, isla markaana ay baahisay dood been abuur ah si loo daboolo dambiyada culus ee ay ka geysteen deegaannada SSC, gaar ahaan magaalada Laascaanood.
War saxaafadeedka SSC-Khaatumo ayaa lagu sheegay in Somaliland muddo sideed bilood ah si arxan darro ah ugu duqeeysay magaalada Laascaanood, iyadoo la beegsaday xaafado shacab deggan yihiin, xarumo caafimaad, iskuullo, ceelal iyo korontada magaalada.
War-saxaafadeedku wuxuu xusay in colaaddaasi ay sababtay, barakaca in ka badan 250,000 oo qof, burburka adeegyada muhiimka ah, dhimasho, dhaawacyo iyo xadgudubyo ay ciidamada Somaliland kula kaceen dadka deegaanka.
“Weerarradaasi waxa ay ahaayeen dadaal Somaliland ugu jirto in ay cabsi geliso dadka ka soo jeeda SSC-Khaatumo si ay u aqbalaan gooni-u-goosadka, hase yeeshee shacabka SSC mar walba ay si cad u diideen in ay ka go’aan Soomaaliya inteeda kale,” ayaa lagu yiri war saxaafadeedka.
War saxaafadeedka SSC-Khaatumo ayaa si toos ah ugu baaqay dowladda Kenya in aysan taageerin goosashada Somaliland, taas oo liddi ku ah xeerarka iyo mabaadi’da Midowga Afrika.
“Kenya waa dal muhiim ah oo taageersan midnimada Qaaradda Afrika. Taageerada ay siiso gooni-u-goosadka Somaliland waxay dhaawacaysaa doorkeeda hoggaamineed,” ayaa lagu yiri bayaanka.
War saxaafadeedka ayaa lagu soo gebagebeeyay in Maamulka SSC Khaatumo ay sii wadi doonaan dadaallada lagu hor istaagayo aqoonsi raadinta Somaliland. Xiisadda sii kordheysa ee u dhexeysa Somaliland iyo SSC Khaatumo ayaa weli taagan, iyadoo maamulka SSC Khaatumo uu si rasmi ah uga mid yahay nidaamka federaalka Soomaaliya, halka Somaliland ay wali ku dadaalayso raadinta aqoonsi caalami ah.
