Muqdisho — Guddoomiyaha Guddiga Doorashada iyo Soohdimaha Qaranka, Cabdikarin Axmed Xasan, ayaa ku dhawaaqay in la soo gabagabeeyay tirinta codadka doorashadii golayaasha deegaanka ee Gobolka Banaadir, taas oo shalay ka dhacday magaalada Muqdisho.
Guddoomiyaha ayaa sheegay in goobtii ugu dambeysay ee tirinta codadka ay xirantay xalay saacaddu markii ay ahayd 2:30 habeenimo, isla markaana tirinta oo dhan lagu fuliyay isla goobihii codbixinta.
“Xalay 2:30 habeenimo ayuu xirmay goobtii ugu dambeysay ee tirinta codadka. Tirinta oo dhan waxay ka dhacday goobihii codbixinta, haatanna waxaan ku jirnaa isku-geynta tirooyinka ka kala yimid degmooyinka, kaddibna waxaan ku dhawaaqi doonnaa natiijooyinka rasmiga ah ee ururrada siyaasadeed,” ayuu warbaahinta u sheegay Cabdikarin Axmed Xasan.
Guddiga doorashada ayaa tilmaamay in natiijooyinka rasmiga ah la shaacin doono marka la dhammeeyo isku-geynta codadka, iyadoo la raacayo dhammaan habraacyada iyo xeerarka doorashada ee dalka u degsan.
