Muqdisho (Dawan)– Dowladda Boqortooyada Ingiriiska ayaa qalab warbaahin iyo isgaarsiin ah ku wareejisay Wasaaradda Gaashaandhigga Soomaaliya, si loo xoojiyo howlaha warbaahinta iyo isku-dubbaridka Ciidanka Xoogga Dalka Soomaaliya, iyadoo dalka uu isku diyaarinayo in ciidamada nabad-ilaalinta Midowga Afrika ay ka baxaan.
Wareejinta qalabka ayaa lagu sameeyay xaflad ay soo qabanqaabisay safaaradda Ingiriiska ee Muqdisho, iyada oo ay goob joog ahaaayeen Safiirka Ingiriiska ee Soomaaliya, Charles King, iyo Agaasimaha Guud ee Difaaca Wasaaradda Gaashaandhigga, Cabdulqaadir Abuukar Maxamed, waxaana qalabka loogu talagalay in lagu taageero awoodda ciidamada ee qorsheynta iyo fulinta isgaarsiinta istiraatiijiga ah inta lagu jiro howlgallada amniga qaranka.
Deeqdan ayaa timid ka dib koorso tababar khaas ah oo loogu talagalay saraakiisha Ciidanka Xoogga Dalka, taas oo diiradda lagu saaray horumarinta xirfadaha howlaha xog-gaarsiinta. Sarreye Gaas Maxamed Bariise, Taliyaha Xarunta Hawlgallada Wadajirka ah (JOCC), ayaa xafladda ka qeyb galay, iyadoo ay wehelinayaan bahwadaag kale oo caalami ah.
"Agaasimaha Guud iyo Safiirka ayaa ku booriyay saraakiisha ka qeybgalaya inay xirfadahooda cusub ee ay barteen ku dabaqaan howlgallada militari si ay gacan uga geystaan ilaalinta amniga qaranka," ayaa lagu yiri qraal kasoo baxay Wasaaradda Gaashaandhigga.
