UNICEF: 333 malyan oo carruur ah ayaa la il-daran faqri

New York (Dawan)- Warbixin ay soo saareen Hay’adda Qaramada Midoobay u qaabilsan Carruurta ee UNICEF iyo Bangiga Adduunka ayaa lagu xaqiijiyay in 333 malyan oo carruur ah ay wajahayaan faqri aad u xun.

Warbixinta ayaa sheegtay in cudurkii coronavirus, colaaadaha , isbeddelka cimilada iyo dhaqaala xumidu ay sababeen in faqrigu ku baahdo dunida.

Baaritaan la sameeyay ayaa lagu ogaaday in mid ka mid ah lixdii carruur ah uu ku noolyahay wax ka yar $2.15 maalintii, sida lagu sheegay warbixinta.

"Dunida ay ku nool yihiin 333 milyan oo caruur ah kuwaas oo ku jira xaalad adag oo faqri ah, oo aan heli karin baahiyaha aasaasiga ah iskaba daaye fursado iyo rajo kale,waa arrin aan loo dulqaadan karin" ayuu yiri, gaasimaha Bangiga Adduunka u qaabilsan arrimaha saboolnimada iyo sinnaanta Luis Felipe López Calva.

Dhankeeda , Agaasimaha Fulinta ee UNICEF Catherine Russell ayaa xusaty in dhibaatooyinka sii xumaanaya ee ka dhashay saameynta Covid-19, iskahor imaadyada sababa dagaallada, isbeddelka cimilada iyo jahawareerka dhaqaalaha adduunku ay caqabad ku noqdeen horumarka carruurta maanta la daala dhaceysa saboolnimada.

Warbixintaan ayaa dhabar jab ku ah yoolkii Qaramada Midoobay ee ahaa in meesha laga saaro saboolnimada daran marka la gaaro 2030.

Warbixinta ayaa tusaale u soo qaadatay in 40 % carruurta ku nool Afrikada Saxaraha ka hooseeysa ay weli ku nool yihiin faqri aad u daran, waxaana lagu tilmaamay in ay tahay goobta ay ku noolyihiin carruurta ugu farqiga badan caalamka.

Bangiga Adduunka iyo UNICEF ayaa ugu baaqay waddamada adduunka in ay mudnaan siiyaan wax ka qabashada saboolnimada carruurta iyo in ay qaadaan tallaabooyin wax ku ool ah sida in la ballaariyo barnaamijyada loo qoondeeyay carruurta si looga hortago mustaqbal xumada ay la kulmi doonaan malaayiin carruur ah oo ku nool daafah dunida.