Waa imisa dadka u diiwaangashan inay codeeyaan doorashada Jabuuti?

Jabuuti (Dawan )– Ololaha doorashada madaxtinimada Jabuuti ayaa si rasmi ah u bilowday, taas oo bilaabaysa 15 maalmood oo dhaqdhaqaaq siyaasadeed ah ka hor doorashada la filayo 10-ka Abriil, sida ay sheegeen mas’uuliyiinta.

Ololaha ayaa furmay habeenimadii Jimcaha saqdii dhexe, wuxuuna socon doonaa ilaa 8-da Abriil, sida uu dhigayo xeerka madaxweynaha ee nidaaminaya doorashada.

Wasiirka Arrimaha Gudaha Saciid Nuux Xasan ayaa sheegay in jadwalkan uu waafaqsan yahay shuruucda doorashada, isagoo intaas ku daray in dowladda ay qaaday dhammaan tallaabooyinka lagama maarmaanka ah si loo hubiyo habsami u socodka .

“Ololaha doorashada wuxuu bilaabanayaa Jimcaha, 27-ka Maarso saqda dhexe, wuxuuna dhammaanayaa 8-da Abriil saqda dhexe,” ayuu yiri wasiirku.

Wasiirka ayaa ugu baaqay musharixiinta inay qabtaan olole masuuliyad leh oo anshax leh, isla markaana ay ixtiraamaan nidaamka guud iyo qiyamka dimuqraadiyadeed.

“Waxaan ku boorinayaa xisbiyada tartamaya inay muujiyaan dareen masuuliyadeed oo ay qaataan dhaqan wanaagsan. Isticmaalka habab sharci darro ah ama ficillo carqaladeyn kara ololaha si adag waa loo mamnuucay,” ayuu yiri.

Wasiirka ayaa sidoo kale ku dhiirrigeliyay shacabka inay si firfircoon uga qeyb qaataan doorashada, isagoo xusay in codbixintu ay tahay xuquuq aasaasi ah iyo waajib muwaadinimo.

“Codbixintu waa xuquuq aasaasi ah, waana habka ugu wanaagsan ee qofku ku muujin karo aragtidiisa una gudan karo waajibaadkiisa muwaadinimo,” ayuu yiri.

Illaa hadda sida ay muujinayaan xogta laga helay Wasaaradda Arrimaha Gudaha, wadar ahaan 256,467 codbixiyayaal ah ayaa loo diwaangeliyey doorashada. Magaalada Jabuuti ayaa haysata tirada ugu baddan oo ah 162,833 codbixiyayaal ah, waxaana ku xiga Dikhil oo leh 24,333, Tadjourah oo leh 22,214, Cali Sabiix oo leh 19,255, Carta oo leh 14,721 iyo Gobolka Obock oo leh 13,101 codbixiyayaal ah.

Mas’uuliyiintu waxay sheegeen in dalka oo dhan laga furi doono 712 goobood oo codbixin ah, iyadoo la fududeynayo helitaanka kaararka codbixinta oo laga qaadan karo xarumaha u furan shacabka ilaa 9-ka Abriil. Mas’uuliyiintu waxay sheegeen in dhammaan tallaabooyinkan lagu xaqiijinayo ka qeybgal ballaaran iyo doorasho si habsami leh u dhacda.