Hargeysa (Dawan)- Maamulka Somaliland ayaa si adag uga horyimid qaraarka Golaha Ammaanka ee Qarammada Midoobay, kaas oo soo jeedinaya in howlaha loo xilsaaray ATMIS ay mid tahay Somaliland.
War-saxaafadeed kasoo baxay Wasaaradda Arrimaha Dibadda iyo Iskaashiga Caalamiga ee Somaliland ayaa lagu yiri " "Somaliland waa dal madax banaan , ATMIS-na waligeed kama howlgelin. Somaliland waxay dhowr jeer sheegtay mowqifkeeda Golaha Ammaanka ee Qaramada Midoobay, hadana waxaa ku celineysa iyada oo la eegayo xaaladihii ugu dambeeyay".
Wasaaradda ayaa intaas raacisay " Xukuumadda Somaliland waxay u soo jeedinaysaa Golaha Ammaanka ee Qaramada Midoobay inay saxaan mawqifkooda ku aaddan go’aan kasta oo ATMIS looga hawlgelinayo Somaliland, lana ixtiraamo rabitaanka shacabka Somaliland ee ah inay noqdaan dal madax-bannaan."
Somaliland ayaa baadi goob ugu jirtay in ay aqoonsi ka hesho caalamka in ka badan 30 sano, waxeyna ku guuleysatay in ay qabato doorashooyin kala duwan kuwaaas oo ay ku dooneysay in ay caalamka uga hesho in loo aqoonsado dowlad ka madax bannaan Soomaaliya.
