Wafdi ka socda Jaamacadda Carabta oo soo gaaray Muqdisho

Muqdisho (Dawan) – Dowladda Federaalka Soomaaliya ayaa si rasmi ah u soo dhaweysay wafdi ballaaran oo ka socda Jaamacadda Carabta, si ay wadahadallo ula yeeshaan Wasaaradda Waxbarashada, Hiddaha iyo Tacliinta Sare iyo hay’adaha waxbarashada ee dalka.

Wafdiga, oo uu hoggaaminayay xoghayaha guud ee Jaamacadda Carabta u qaabilsan arrimaha waxbarashada, dhaqanka iyo cilmiga, Maxamed Ould Acmar, ayaa ujeedkiisu ahaa indha-indheyn lagu sameeyo xaaladda guud ee waxbarashada Soomaaliya, isla markaana lagu xoojiyo iskaashiga dhinacyada horumarinta tacliinta iyo barashada af-Carabiga.

Wasiirka Waxbarashada, Hiddaha iyo Tacliinta Sare ee Soomaaliya, Faarax Sheekh Cabdulqaadir, oo wafdiga qaabilay, ayaa sheegay in booqashadu ay muhiim u tahay horumarinta waxbarashada dalka, isla markaana ay fursad u tahay wada-tashi laga yeesho sidii sare loogu qaadi lahaa tayada waxbarashada iyo doorka af-Carabiga ee nidaamka tacliinta.

Wafdiga Jaamacadda Carabta ayaa la filayaa inay kulammo la yeeshaan mas’uuliyiinta sare ee dalka iyo hay’adaha waxbarashada, si looga wada hadlo mashaariic wadajir ah, taageero farsamo, iyo barnaamijyo kor u qaadaya waxbarashada dalka.

Booqashadan ayaa sidoo kale ku soo beegmaysa xilli Soomaaliya ay xusayso sanad-guuradii 52aad ee ka soo wareegtay ku biiritaanka Jaamacadda Carabta, taasoo dowladda ku tilmaantay astaan muujinaysa xiriirka taariikheed iyo iskaashiga ka dhaxeeya Soomaaliya iyo dalalka Carabta.

Ugu dambeyn, dowladda Soomaaliya ayaa muujisay rajada ah in booqashadan ay horseedi doonto wadahadallo miro-dhal ah iyo iskaashi waara oo gacan ka geysan doona horumarinta waxbarashada iyo dhaqanka dalka.