Laascaanood (Dawan) – Madaxweynaha Dowlad Goboleedka Waqooyi Bari ee Soomaaliya, Cabdiqaadir Axmed Aw Cali, ayaa Habeenimadii Talaadada si rasmi ah uga dhawaaqay Laascaanood daahfurka diiwaangelinta codbixiyayaasha ee doorashooyinka Qof iyo Codka ah.
Madaxweynahe Firdhiye ayaa Xafladda daahfurka ka sheegay in gobolka uu si buuxda ugu diyaar garoobay doorashooyinka heer qaran, heer dawlad goboleed, iyo heer degmo. Waxa uu intaa ku daray in dadaallo xooggan la gelinayo si loo hubiyo ka-qaybgalka shacabka ee geeddi-socodka doorashada.“Waa in dadkeennu ay doorashada galaan, is-abaabulaan si weyna isu diiwangeliyeen, waa in aynu la baratanaa maamulada dalka, waxaan kalsooni buuxda ku qabaa in reer Waqooyi Bari ay wacdaro ka dhigi doonaan doorashooyinka qaranka” ayuu yiri Madaxweynaha Aw Cali.
Wasiirka Wasaaradda Arrimaha Gudaha, Federaalka iyo Dib-u-heshiisiinta Soomaaliya, Ali Yusuf Ali-Xoosh, oo ka hadlay munaasabadda, ayaa tilmaamay in doorashadu ay tahay xuquuq dastuuri ah. “Doorashadu waa xuquuq dastuuri ah oo ay farayaan Dastuurka Federaalka KMG ah ee Soomaaliya iyo Dastuurka Dowlad Goboleedka Waqooyi Bari.,” ayuu yiri.
Ku dhawaaqidda daahfurka diiwaangelinta codbixiyayaasha ayaa imaanaysa iyadoo Guddiga Doorashooyinka Qaranka ay Talaadadii ku dhawaaqeen in diiwaangelinta codbixiyayaasha maanta oo Arbaco ah si rasmi ah laga bilaabi doono Laascaanood, taasoo qayb ka ah dadaallada lagu diyaarinayo doorashooyinka soo socda.
