Wax badan ka ogoow sharciga amniga internetka ee la ansixiyay

Muqdisho (Dawan) –Golaha Shacabka ee Baarlamaanka Federaalka Soomaaliya ayaa maanta ansixiyay Sharciga Qaranka ee Amniga Internet-ka (Amniga Saybarka), kaas oo lagu tilmaamay mid muhiim u ah xoojinta difaaca dijitaalka ah, ilaalinta nidaamyada macluumaadka, iyo sugidda amniga qaranka ee ku xiran teknoolojiyadda casriga ah.

Sharcigan ayaa lagu ansixiyay cod aqlabiyad leh, kaddib kulan uu shir-guddoomiyay Guddoomiyaha Golaha Shacabka Sheekh Aadan Maxamed Nuur (Madoobe), waxaana 144 xildhibaan ay u codeeyeen oggolaansho, halka hal mudane oo kaliya uu ka soo horjeestay, iyadoo kulanka ay joogeen 145xildhibaan.

Sharciga Amniga Internet-ka wuxuu si gaar ah diiradda u saaraya xoojinta kaabayaasha dijitaalka ah ee dalka, ilaalinta nidaamyada macluumaadka ee muhiimka ah, iyo horumarinta awoodda dowladda ee ka hortagga hanjabaadaha iyo weerarrada internet-ka.

Waxa uu sidoo kale Guddiga Isgaarsiinta Qaranka (NCA) u aqoonsanayaa hay’adda ugu sarreysa ee mas’uulka ka ah maareynta iyo hagidda amniga internet-ka ee heer qaran.

Sharcigu wuxuu dhigaya in la dhiso Guddiga Amniga Internet-ka oo ka kooban sagaal xubnood, iyo Xarunta Ka Jawaabta Dhacdooyinka Internet-ka, si loo helo nidaam isku-dubaridan oo wax looga qabto khataraha dijitaalka ah.

Sidoo kale, sharcigu wuxuu aasaasayaa Kooxda Falcelinta Degdegga ah ee Amniga Saybarka (SOM-CIRT), oo qaabilsan bixinta digniino hore, la socodka weerarrada, iyo faafinta xogta la xiriirta khataraha amniga internet-ka.

Agaasimaha Guud ee Guddiga Isgaarsiinta Qaranka, Mustafa Yassin Sheekh, ayaa sharcigan ku tilmaamay “tallaabo istiraatiiji ah oo lagu dhisayo nidaam qaran oo mideysan, laguna xoojinayo diyaar-garowga iyo awoodda dalka ee ka jawaabista hanjabaadaha dijitaalka ah.”

Dhankiisa, Wasiiru-Dowlaha Wasaaradda Isgaarsiinta iyo Teknoolojiyadda, Axmed Cismaan Diiriye, ayaa sheegay in sharcigu uu ilaalinayo danaha muwaadiniinta, korna u qaadayo amniga qaranka, isla markaana uu waafaqsan yahay heerarka iyo habraacyada caalamiga ah ee amniga internet-ka.

Mas’uuliyiintu waxay tilmaameen in sharcigu sidoo kale hiigsanayo ka hortagga weerarrada internet-ka, kor u qaadista wacyiga amniga dijitaalka ah, taageeridda aqoonta teknoolojiyadda, xoojinta kalsoonida adeegyada dijitaalka ah, iyo adkeynta iskaashiga u dhexeeya hay’adaha dowladda, sektor-ka gaarka loo leeyahay, iyo la-hawlgalayaasha caalamiga ah.

Sharcigan ayaa hadda u gudbaya Golaha Aqalka Sare si ay u ansixiyaan, ka hor inta aan loo gudbin Madaxweynaha Jamhuuriyadda Federaalka Soomaaliya si uu u saxiixo una noqdo sharci si rasmi ah u dhaqan gala.