Muqdisho (Dawan) — Ra’iisul Wasaaraha Soomaaliya, Xamse Cabdi Barre, ayaa ku tilmaamay ku dhawaaqista Ra’iisul Wasaaraha Israa’iil Benjamin Netanyahu ee aqoonsiga Somaliland arrin “xadgudub cad” ku ah madaxbannaanida Jamhuuriyadda Federaalka Soomaaliya iyo midnimada dhulkeeda, isaga oo carrabka ku adkeeyay in tallaabadaasi tahay mid baadil ah, oo aan sharciyad haysanin.
Ra’iisul Wasaaraha, oo wareysi siiyay Aljazeera, ayaa sheegay in aqoonsigaas uusan wax saameyn sharci ah yeelanayn, isagoo carrabka ku adkeeyay in Soomaaliya tahay dowlad madax-bannaan oo leh xuduudo caalami ah oo la aqoonsan yahay.
Wuxuu sidoo kale xaqiijiyay in Soomaaliya — dowlad iyo shacabba — si buuxda u diidan tahay mowqifka Netanyahu oo uu ku sifeeyay mid “halis iyo masuuliyad-darro ah,” isaga oo xusay in ay habboonayd in Israa’iil ay aqoonsato dowladnimada Falastiin, oo ay dhulkeeda haysato isla markaana dadkeeda barakicisay, halkii ay faragelin ku samayn lahayd arrimaha gudaha ee Soomaaliya.
Ra’iisul Wasaare Xamse Cabdi Barre ayaa ka digay cawaaqibta siyaasadeed ee ka dhalan karta tallaabada Israa’iil, isaga oo tilmaamay in Israa’iil ay doonayso inay hesho meel istaraatiiji ah oo ay ka degto Geeska Afrika, si ay u xakamayso Badda Cas iyo marin-biyoodka Baabul-Mandab.
Wuxuu intaas ku daray in dadaalladaas ay ku jiraan isku dayo lagu dhisayo saldhigyo ciidan, kuwaas oo uu ku tilmaamay “tallaabo halis ah” oo khatar ku ah amniga muwaadiniinta Soomaaliyeed iyo xasilloonida guud ee gobolka.
