Oslo (Dawan)- Madaxweynaha Soomaaliya, Xasan Sheekh Maxamuud oo ku guda jira booqashada uu ku joogo dalka Norway ayaa maanta kulan la qaatay Ra'iisul Wasaaraha dalkaas , Jonas Gahr Støre.
Madaxweynaha iyo Ra'iisul Wasaaraha Norway ayaa si qoto dheer uga wada hadlay horumarinta iskaashiga labada dal, waxayna isla qaateen in la xoojiyo iskaashiga dhaqaalaha, mashaariicda horumarka iyo amniga, sida ay sheegtay Vlla Somalia.
" Sidoo kale, waxaa si gaar ah diiradda loo saaray xadgudubka Itoobiya ee ka dhanka ah madaxbannaanida Soomaaliya iyo xasiloonida gobolka" ayaa lagu yiri, qoraal kasoo baxay madaxtooyada.
Madaxweynaha ayaa uga warbixiyey Ra'iisul Wasaaraha Norway dhibaatada ka dhalatay xadgudubka Itoobiya iyo dadaallada dowladda Soomaaliya ee ku aaddan ilaalinta madaxbannaanida iyo midnimada dalka.
Madaxweynaha iyo wafdigiisa ayaa sidoo kale Ra'iisul Wasaaraha Norway la wadaagay dadaallada xooggan ee dowladda Soomaaliya ay ku bixineyso dagaalka ka dhanka ah kooxda Al-shabaab, isagoo caddeeyey in dowladda Soomaaliya ay ka go'an tahay in ay cirib tirto Al-shabaab oo caqabad ku ah nabadda iyo xasiloonida dalka iyo gobolka, sida ay tilmaamtay Villa Somalia.
