Addis Ababa (Dawan)— Ra’iisul Wasaaraha Itoobiya Abiy Axmed ayaa magaalada Addis Ababa ku qaabilay Madaxweynaha Jamhuuriyadda Federaalka Soomaaliya Xasan Sheekh Maxamuud, oo halkaas ku tegay booqasho shaqo oo hal maalin ah, iyadoo labada hoggaamiye ay yeesheen wada-xaajood diiradda lagu saaray xoojinta xiriirka laba geesoodka ah iyo iskaashiga heer gobol.
Qoraal uu Ra’iisul Wasaare Abiy ku baahiyay bartiisa Facebook-ga ayuu ku sheegay in kulanku ahaa “wada-hadallo miro-dhal ah”, isla markaana uu qayb ka yahay dadaallada lagu dardargelinayo wada-shaqeyn labada dal ka dhexaysay sannadkii la soo dhaafay. Wuxuu intaas ku daray in kulanka lagu adkeeyay go’aanka labada dhinac ee ku aaddan horumarinta danaha wadajirka ah, ballaarinta iskaashiga istaraatiijiga ah iyo taageeridda xasilloonida iyo horumarka Geeska Afrika.
