Xasan Sheekh oo Itoobiya uga tacsiyeeyay dad ku dhintay dhul-go’ay

Soomaaliya, 16 Maarso 2026 (Dawan)- Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa caawa oo Isniin ah tacsi u diray Ra’iisul Wasaaraha Itoobiya, Abiy Axmed, kadib dhul-go’yo iyo fatahaado xooggan oo ka dhacay koonfurta Itoobiya, kuwaas oo ay ku dhinteen ugu yaraan 125 qof.

War qoraal ah oo ka soo baxay Madaxtooyada Soomaaliya ayaa lagu sheegay in madaxweynuhu tacsi tiiraanyo leh u diray qoysaska ay dhibaatadu soo gaartay iyo dadka ku barakacay masiibadan. “Soomaaliya waxay garab taagan tahay shacabka iyo dowladda Itoobiya xilligan adag,” ayaa lagu yiri qoraal ay Madaxtooyadu soo dhigtay barta X.

Dhul-go’yadan, oo ay sababeen roobab xooggan, ayaa ku dhuftay dhowr degmo oo ka tirsan aagga Gamo. Maamulka gobolka ayaa Isniintii xaqiijiyay in tirada dhimashadu gaartay 125 qof, halka in ka badan 11,000 oo qof ay ku barakaceen.

Hawlgallada gurmadka iyo samatabbixinta ayaa weli ka socda degaanka buuraleyda ah, kaas oo u nugul in dhul-go’yo kale ay ka dhacaan, maadaama roobabku ay weli sii socdaan.