Xasan Sheekh: War wax la imaada oo nafahansiiya, waan idinkala doodeynaa

Muqdisho, 20 December 2025 (Dawan) – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa si cad u sheegay in Villa Soomaaliya ay diyaar u tahay in ay dhageysato wixii aragti iyo go’aan ah ee ka soo baxa Shirka Kismaayo, isla markaana ay diyaar u yihiin wadahadal dhab ah oo u adeegaya masiirka umadda iyo dalka. Hadalkan ayuu Madaxweynuhu ka sheegay munaasabadda xuska 82-aad ee aasaaska Ciidanka Booliska Soomaaliyeed oo maanta ka dhacday Muqdisho.

Xasan Sheekh Maxamuud ayaa carrabka ku adkeeyay in dowladdu aysan diidaneyn is-faham iyo wadahadal siyaasadeed, balse ay muhiim tahay in doodaha lagu saleeyo wax cad oo dowladnimada horumar u ah. Madaxweynaha ayaa sidoo kale tilmaamay in xeerarka doorashooyinka, xeerka axsaabta, iyo dastuurka la ansixiyay ay yihiin saldhigga ay dowladdu ku taagan tahay.

Madaxweynaha ayaa sidoo kale dhaliilay mas’uuliyiinta ka tirsan hay'adaha dowladda ee ka qeybgalaya shirka Kismaayo, oo aragtiyadooda siyaasadeed aan ku cabbirin gudaha hay’adaha dowliga ah sida Baarlamaanka iyo Golaha Wadatashiga Qaranka. Waxa uu ku boorriyay in dhammaan doodaha la soo bandhigo ay ku saleysnaadaan nidaamka dowladnimo iyo dastuurka, si loo helo xal dan u ah Soomaaliya.

Shirka Kismaayo waxaa isugu tegay siyaasiyiin iyo hoggaamiyeyaal mucaarad ah oo ka doodaya jihada siyaasadeed ee dalka, doorashooyinka, iyo mustaqbalka dowladnimada Soomaaliya.