Muqdisho, 17 December 2025 (Dawan)- Xiriirka diblomaasiyadeed ee u dhexeeya Jamhuuriyadda Federaalka Soomaaliya iyo Jamhuuriyadda Dadka Shiinaha waxaa u buuxsamay 65 sano, iyada oo munaasabad lagu xusayo lagu qabtay magaalada Muqdisho.
Ra’iisul Wasaaraha Soomaaliya, Mudane Xamsa Cabdi Barre oo munaasabadda ka jeediyay khudbad ayaa sheegay in xiriirka labada dal, oo la aas-aasay sanadkii 1960-kii, uu ku dhisan yahay saaxiibtinimo qoto dheer, ixtiraamka madaxbannaanida dal kasta, is-fahan iyo iskaashi ku dhisan faa’iido wadaag ah. Wuxuu xusay in Shiinaha mar walba garab taagnaa Soomaaliya, gaar ahaan xilliyadii adkaa ee dalku soo maray.
Mudane Xamsa Cabdi Barre ayaa tilmaamay in dowladda Shiinaha ay Soomaaliya ka taageerto dhinacyada amniga, horumarinta kaabayaasha dhaqaalaha iyo arrimaha bini’aadantinimada, taas oo muujinaysa ballan-qaadka Beijing ee ku aaddan xasilloonida iyo horumarka dalka.
Ra’iisul Wasaaraha ayaa si gaar ah u bogaadiyay taageerada bini’aadantinimo ee dhawaan ay bixisay dowladda Shiinaha, oo gaareysa hal milyan oo doollar, taas oo loogu talagalay wax-ka-qabashada saameynta abaaraha ka jira qeybo ka mid ah dalka, isaga oo ku tilmaamay tallaabo muujinaysa garab-istaag dhab ah iyo saaxiibtinimo fog.
Munaasabadda ayaa waxaa ka qeyb galay xubno ka tirsan Golaha Wasiirrada Soomaaliya, danjireyaal shisheeye oo fadhigoodu yahay Muqdisho, iyo marti-sharaf kale.
