Muqdisho (Dawan ) – Xisbiga Xaqsoor ayaa soo dhaweeyay warmurtiyeedka kasoo baxay Shirweynaha Difaaca Dastuurka oo 27-ka Febraayo ka qabsoomay magaalada Muqdisho, isagoo ku tilmaamay mid ka tarjumaya baahida loo qabo ilaalinta Dastuurka KMG ah ee dalka.
War-saxaafadeed uu xisbigu soo saaray ayuu ku caddeeyay inuu si buuxda u taageersan yahay qodobbada lagu adkeeyay in wax-ka-beddel kasta oo lagu sameeyo Dastuurka 2012 inuu maro habraacyada ku xusan dastuurka laftiisa. Xisbigu wuxuu sheegay in wax-ka-beddelka uu ku eedeeyay xukuumadda Soomaaliya uu yahay mid baalmarsan nidaamka sharci ee lagu ansixiyay Dastuurka KMG ah.
“Dastuurka ay Soomaali si KMG ah u ansixisay waa kii 2012-kii. Beddelka lagu sameeyay dastuurkaasna waa mid gabi ahaanba baalmarsan habraacyada ku cad dastuurka sharciga ah,” ayaa lagu yiri bayaanka.
