Soomaaliya, 28 Febraayo 2026 (Dawan)- Wasaaradda Gaadiidka iyo Duulista Hawada Soomaaliya ayaa maanta oo Sabti ah soo saartay beenin rasmi ah oo ku saabsan wararka sheegaya in la joojiyay adeegyada taarikada gaadiidka, iyadoo hadalkaas ku tilmaantay "marin-habaabin ula kac ah" oo loogu talagalay in lagu carqaladeeyo hab-maamuuska amniga dalka.
War-saxaafadeedka wasaaradda ayaa daba socda warar ay baahiyeen warbaahinta gudaha iyo shakhsiyaad oo sheegaya khilaaf gudaha ah oo la sheegay inuu u dhexeeyo Wasiirka Gaadiidka Maxamed Faarax Nuux iyo Agaasimaha Guud Cumar Cali Afrax, kaas oo ay sheegeen inuu curyaamiyay hawlihii shaqo muddo ka badan laba bilood.
"Wasaaradda Gaadiidka iyo Duulista Hawada waxay si cad u beeninaysaa wararka beenta ah ee la faafinayo... kuwaas oo si khaldan ugu xiray shaqada iyo adeegyada ay wasaaraddu u qabato muwaadiniinta Soomaaliyeed," ayaa lagu yiri war-saxaafadeedka rasmiga ah. Waxa ay intaas ku dartay in bixinta taarikada ay u socoto "si habsami leh" oo aan wax kala go' ah lahayn.
Wasaaraddu waxay xiriirisay waqtiga ay soo baxeen xantaan iyo amar dhawaan ka soo baxay Wasaaradda Amniga Gudaha kaas oo faraya in dhammaan gaadiidka dawladda iyo kuwa dadweynuhu ay qaataan taarikada rasmiga ah marka la gaaro 5-ta Maarso, 2026.
