Yaa leh diyaaradaha F-16 ee ku sugan Muqdisho?

Muqdisho (Dawan)— Dowladda Federaalka Soomaaliya ayaa maanta oo Khamiis ah si rasmi ah ugu xaqiijisay warbaahinta Dawan in diyaaradaha dagaalka ee nooca F-16 ee dhawaan yimid Muqdisho ay leeyihiin dowladda Turkiga, balse aysan ahayn kuwo ay iska leeyihiin Ciidanka Xoogga Dalka Soomaaliyeed.

Wasiirka Gaashaandhigga Soomaaliya, Mudane Axmed Macallin Fiqi, ayaa Dawan u sheegay in diyaaradahaasi ay si buuxda u hoos tagaan dowladda Turkiga, isagoo carrabka ku adkeeyay in hadal uu hore u sheegay si khaldan loo fahmay.

“Diyaaradaha waxaa iska leh dowladda walaalaha ah ee Turkiga. Khalad ayaa loo fahmay kelmad yar oo aan shalay iri, maadaama codka marfoonka uu kala go’ay,” ayuu yiri Wasiir Fiqi.

Wasiirka ayaa shalay sheegay in diyaaradaha loo keenay Ciidanka Xoogga Dalka, taas oo dad badan u fasirteen in ay si toos ah u leeyihiin ciidamadaas, balse maanta uu caddeeyay in ay yihiin diyaarado Turkigu leeyahay oo taageero militari ahaan u jooga dalka.

Sidoo kale, Wasiir Fiqi ayaa xusay in taageerada Turkiga ee Soomaaliya ay sanadkan gaartay heerkii ugu sarreeyay, isagoo tilmaamay in Ankara ay si buuxda u garab ugu taagan tahay Soomaaliya dagaalka adag ee ka dhanka ah kooxaha argagixisada.

Diyaaradaha F-16 ayaa Talaadadii sameeyay duulimaadyo tijaabo ah oo ka dhacay hawada Muqdisho, waxaana la sheegay in tiradoodu ay gaarayso saddex diyaaradood, kuwaas oo dalka soo gaaray toddobaadkii hore.

Dowladda Federaalka Soomaaliya ayaa horey u sheegtay in joogitaanka diyaaradaha F-16 uu qayb ka yahay dadaallada lagu xoojinayo howlgalada militari ee ka dhanka ah kooxda Al-Shabaab, oo muddo ka badan toban sano dagaal kula jirtay dowladda Soomaaliya.