Yemen oo laashay heshiiskii difaaca ee Imaaraadka

Sanca – 30 Diseembar 2025 (Dawan)- Dowladda Yemen ayaa ku dhawaaqday inay laashay heshiiskii wadajirka ahaa ee difaaca iyo amniga ee kala dhaxeeyay Imaaraadka Carabta, iyadoo sidoo kalena ku amartay dhammaan ciidammada Imaaraadka inay ka baxaan dhulka Yemen muddo 24 saacadood gudahood ah.

Go’aankan ayaa yimid kaddib markii Imaaraadku uu diyaarado hub siday u diray ciidamada Golaha Kumeelgaarka Koonfureed ee ka dagaallama koonfurta Yemen, kuwaas oo si cad uga soo horjeeda dowladda la aqoonsanyahay ee Yemen.

Guddoomiyaha Golaha Hoggaanka Yemen, Rashaad Al-Caliimi, oo go’aanka ku dhawaaqay, ayaa si adag u sheegay in aan la aqbali karin joogitaanka ciidamo shisheeye oo sharci-darro ah.

“Dhammaan ciidammada Imaaraadka waa inay si degdeg ah uga baxaan dhulka Yemen 24 saacadood gudahood,” ayuu yiri Al-Caliimi.

Dhanka kale, Yemen ayaa ku dhawaaqday in dalku ku jiri doono xaalad degdeg ah muddo 90 maalmood ah, iyadoo sidoo kale la soo rogay xayiraad dhaqdhaqaaq oo socon doonta 72 saacadood, kuna saabsan safarka cirka, badda iyo berriga, gaar ahaan dekedaha iyo xuduudaha dalka.

Go’aankan ayaa kusoo beegmaya xilli ay sii xoogeysanayaan xiisadaha u dhexeeya Yemen iyo Imaaraadka, iyada oo ay Sanca ku eedeysay Imaaraadka inuu taageero siiyo kooxaha gooni-u-goosadka ah ee koonfurta dalka, isla markaana faragelin ku hayo arrimaha gudaha Yemen.

Dhanka kale, isbahaysiga Carabta ee uu hoggaamiyo Sacuudiga ayaa dhawaan duqeyn xaddidan ka fuliyay dekedda Mukalla, taasoo lala beegsaday laba markab. Afhayeenka isbahaysiga, Jeneraal Turki Al-Maaliki, ayaa sheegay in maraakiibtaas ay ka yimaadeen dekedda Fujairah ee Imaaraadka, islamarkaana ay galeen dekedda Mukalla iyaga oo aan fasax ka haysan taliska isbahaysiga, intii u dhaxaysay 27–28 Diseembar.

Wararka soo baxaya ayaa muujinaya in tallaabadan ay astaan u tahay marxalad cusub oo khilaaf siyaasadeed iyo mid amni oo ka dhex qarxday xulafadii hore ee ku lugta lahaa dagaalka Yemen.