Yurub oo la filayo inay maalgelinta AUSSOM ku dhawaaqdo bilowga 2026

Muqdisho, 14 December 2025 (Dawan)- Midowga Yurub ayaa la filayaa inuu bilowga sanadka 2026 si rasmi ah ugu dhawaaqo maalgelinta Howlgalka Midowga Afrika ee Taageerada iyo Xasilinta Soomaaliya (AUSSOM), kadib muddo labo sano ah oo uu ka gaabsaday kaalinta dhaqaale ee tooska ah, sida ay muujinayaan dukumentiyo iyo ilo diblomaasiyadeed oo la xiriira Qaramada Midoobay iyo Midowga Afrika.

Afhayeen u hadlay Midowga Yurub ayaa wargeyska East African u sheegay in Brussels ay ka go’an tahay sii wadista taageerada howlgalka Soomaaliya, balse faahfaahinta xirmada maalgelinta oo ay ku jirto qadarka lacagta, muddada ay soconayso, iyo habka bixinta la shaacin doono marka 27-ka dal ee xubnaha ka ah Midowga Yurub ka heshiiyaan xirmada guud.

“Waxaa naga go’an in la hubiyo sii wadista taageerada Midowga Yurub. Qaabka saxda ah ee taageerada ayaa lagu dhawaaqi doonaa marka xirmada taageeradu dhammaato,” ayuu afhayeenku yiri.

Dukumentiyo la xiriira Golaha Ammaanka ee Qaramada Midoobay ayaa tilmaamaya in Midowga Yurub la filayo inay ku dhawaaqo maalgelinta AUSSOM horraanta 2026, taas oo loo arko calaamad muujinaysa in Midowga Yurub uu dib ugu soo laabanayo kaalintii uu hore uga hayay ee taageerada maaliyadeed ee howlgalka.

Howlgalka AUSSOM ayaa wajahaya cadaadis dhaqaale oo xooggan, kadib markii Midowga Yurub uusan wax maalgelin ah ku darin hawlgallada 2025, halka Maraykankuna uu diiday hirgelinta nidaamka maalgelinta ee ku salaysnaa tabarucaadka lagu qiimeeyo Qaramada Midoobay, sida ku xusan Qaraarka Golaha Ammaanka ee QM 2719 ee 2023. Qaraarkan wuxuu ujeedkiisu ahaa in la daboolo 75% miisaaniyadda shanta sano ee AUSSOM oo gaareysa $832.5 milyan si loo helo ilo dhaqaale oo la isku hallayn karo, balse hirgelintiisa ayaa hakad gashay.

Miisaaniyadda sannadlaha ah ee howlgalka AUSSOM ayaa lagu qiyaasaa $166.5 milyan, halka tabarucaadyada la helay ilaa hadda ay aad uga hooseeyso heerkaas. Sanadkan 2025, Midowga Yurub wuxuu taageeradiisa Soomaaliya ku koobay gargaarka bani’aadannimo oo gaaray €67.33 milyan, taas oo ka hooseysa taageeradii 2024 oo gaareysay €82.16 milyan .

Inkasta oo deeq-bixiyeyaal kale ay soo baxeen—sida Japan, Kuuriyada Koonfureed, iyo Shiinaha oo si wadajir ah u bixiyay $4.5 milyan, iyo Talyaaniga iyo Isbaanishka oo midkiiba ballanqaaday $1 milyan—haddana ma ahan taageero dabooli kara baahida howlgalka.

Go’aankan la filayo ee Midowga Yurub ee maalgelinta AUSSOM ayaa loo arkaa isbeddel istiraatiiji ah oo ku yimid siyaasadda Yurub ee Soomaaliya marka loo eego mowqifkii labadii sano ee la soo dhaafay, wuxuuna fursad siinayaa howlgalka inuu helo taageero dhaqaale oo joogto ah.