Xudur (Dawan ) – Degmada Xudur ee gobolka Bakool ayaa noqotay bartamaha khilaaf siyaasadeedka sii xoogeysanaya ee u dhexeeya dowlad goboleedka Koonfur Galbeed iyo Dowladda Federaalka, kaddib markii ay soo baxeen go’aanno is khilaafsan oo ku saabsan kala dirista maamulka degmada iyo magacaabis cusub oo aan weli si cad loo xaqiijin karin dhaqan-galkeeda, maadaama tii horeba aan loo hirgelin si buuxda.
Khilaafkan ayaa yimid kaddib wareegto ka soo baxday Wasaaradda Arrimaha Gudaha ee Dowlad Goboleedka Koonfur Galbeed, taas oo lagu kala diray maamulkii hore ee degmada Xudur 21 Maarso, maalin kaddib markii maamulka degmadaasi uu ku dhawaaqay inuu taageersan yahay dowladda federaalka oo uu khilaaf kala dhexeeyo maamulka Koonfur Galbeed.
Maanta mar kale Wasiirka Arrimaha Gudaha ee Dowlad Goboleedka Koonfur Galbeed ayaa magacaabay mas’uuliyiin cusub oo la sheegay inay la wareegayaan hoggaanka Xudur, inkastoo degmada aysan si buuxda gacanta ugu hayn maamulka Koonfur Galbeed. Si kastaba ha ahaatee, wararka ka imanaya gudaha degmada ayaa tilmaamaya in aan si fudud loo hirgelin karin go’aankan, maadaama maamulka hore uu diiday inuu taageero maamulka Baydhabo.
Ilo deegaanka ah ayaa sheegaya in ciidamada iyo maamulka taageersan dowladda federaalka ay weli ku sugan yihiin degmada, iyadoo xildhibaano iyo siyaasiyiin ka soo horjeeda maamulka Koonfur Galbeed ay maalmihii la soo dhaafay booqashooyin ku tageen halkaas.
