Muqdisho (Dawan) – Ururka Ramaas ayaa sheegay in adeegsiga xoogga iyo iska hor imaadyada hubeysan inaysan xal u noqon karin khilaafaadka siyaasadeed ee ka jira Soomaaliya, isagoo ku baaqay in la doorto wadahadal, sharciyad, iyo hannaan lagu kalsoonaan karo oo lagu maareeyo kala aragti duwanaanshaha siyaasadeed.
War-saxaafadeed uu ururku soo saaray ayaa lagu muujiyay walaac xooggan oo ku aaddan dib u dhaca ku yimid dhammaystirka doorashooyinkii golayaasha deegaanka ee gobolka Banaadir, inkastoo ay ka soo wareegtay ku dhowaad saddex bilood tan iyo markii la qabtay doorashadaasi bishii December 2025.
Ururka Ramaas ayaa sheegay in doorashooyinkaas ay ahaayeen tallaabo taariikhi ah oo dib u soo celin karta kalsoonida shacabka iyo rajada dowladnimo, maadaama ay shacabka Muqdisho markii ugu horreysay muddo ka badan 50 sano si toos ah u doorteen wakiilladooda.
Si kastaba ha ahaatee, ururku wuxuu xusay in weli aan si rasmi ah xilalka loogu wareejin xubnihii la soo doortay, taas oo uu ku tilmaamay arrin halis gelin karta kalsoonida dadweynaha isla markaana dhaawici karta geeddi-socodka dimuqraadiyadda.
“Dib u dhigista iyo hakinta hirgelinta natiijada doorashada waxay wiiqi kartaa kalsoonida shacabka, waxayna farriin qaldan u diri kartaa jiilka cusub ee siyaasadda kusoo biiraya,” ayaa lagu yiri war-saxaafadeedka.
Ramaas ayaa sidoo kale ka digay in lagu dhawaaqo doorashooyin cusub oo heer federaal ama dowlad-goboleed iyadoo aan la dhammaystirin doorashooyinkii hore ee heer deegaan, isagoo ku adkeeyay in geeddi-socodka doorasho uu u baahan yahay qaab isku xigxiga iyo kalsooni.
