Hirshabeelle (Dawan ) – Guddiga Madaxa Bannaan ee Doorashooyinka Qaranka iyo Soohdimaha ayaa maanta si rasmi ah uga daahfuray degmada Jalalaqsi ololaha diiwaangelinta codbixiyeyaasha, taas oo qayb ka ah qorshaha guud ee dalka loogu diyaarinayo doorashooyinka soo socda ee dowlad-goboleedyada Hirshabeelle, Galmudug, Koonfur Galbeed iyo Waqooyi Bari, kuwaas oo lagu soo dooran doono golayaasha deegaanka degmooyinka.
Degmadan Jalalaqsi ayaa noqotay tii ugu horreysay ee laga bilaabo diiwaangelinta codbixiyeyaasha ee degmooyinka gobolka Hiiraan ee dowlad-goboleedka Hirshabeelle.
Mas’uuliyiin ka socday Guddiga Doorashooyinka Qaranka iyo maamulka degmada Jalalaqsi ayaa ka qeybgalay munaasabadda daahfurka, iyagoo sharaxay muhiimadda diiwaangelinta codbixiyeyaasha iyo doorka ay ku leeyihiin ka qeybgalka doorashooyinka 2026.
