Muqdisho, 3 Maarso 2026 (Dawan) – Dowladda Federaalka Soomaaliya ayaa sheegtay inay Mareykanka u furantahay maalgashi uu ku sameeyo qaybta tamarta, iyadoo u soo bandhigtay in ka badan 200 baloog oo shidaal iyo gaas ah oo ku yaalla badda. Tallaabadan ayaa qeyb ka ah dadaallada ay dowladdu ku dooneyso inay ka faa’iideysato kheyraadkeeda dabiiciga ah si loo dardargeliyo soo kabashada dhaqaalaha dalka.
Ku dhawaaqistan ayaa timid kaddib wadahadallo heer sare ah oo ka dhacay Muqdisho, kuwaas oo dhex maray mas’uuliyiin Soomaaliyeed iyo wafdi ka socday Mareykanka oo uu hoggaaminayay Sii-hayaha Safaaradda Mareykanka ee Soomaaliya, Justin Davis. Wadahadallada ayaa diiradda lagu saaray abuurista hannaan sharci iyo mid maamul oo hufan si shirkadaha Mareykanka ay uga sahamiyaan shidaalka iyo macdanta muhiimka ah ee dalka.
“Baloogyada la diiwaangeliyey ee laga filayo shidaalka waa 268 baloog oo badeed,” ayuu u sheegay Dawan Media Wasiiru Dowlaha Arrimaha Dibadda, Cali Cumar (Cali Balcad), kaddib kulan albaabadu u xirnaayeen. “Turkiga waxaa la siiyey saddex baloog oo keliya, halka inta kale ay weli furan yihiin. Soomaaliya waxay diyaar u tahay inay la macaamisho Mareykanka iyo cid kasta oo daneyneysa.” ayuu raaciyay hadalkiisa.
Mas’uuliyiintu waxay carrabka ku adkeeyeen in mudnaan la siinayo xoojinta hannaanka sharciyeed si loo xaqiijiyo jawi maalgashi oo deggan, looguna kalsoonaan karo shirkadaha caalamiga ah.
"Dawladda Soomaaliya waxay diyaar u tahay inay soo dhoweyso shirkadaha Maraykanka ee danaynaya inay ka shaqeeyaan dalka, annagoo dhankayaga ka diyaarinayna dhamaan agabkii iyo shuruucdii looga baahnaa in maalgashi lagu sameeyo," ayuu yiri Wasiirka Ganacsiga iyo Warshadaha Jamaal Maxamed.
Wuxuu intaas ku daray in wadahadalladani ay noqon karaan bilowga iskaashi ballaaran oo horseeda koboc dhaqaale.
