Itoobiya oo caddeysay mowqifkeeda ku aaddan midnimada Soomaaliya

Addis Ababa (Dawan)– Dowladda Itoobiya ayaa caddeysay inay si buuxda uga go’an tahay ixtiraamka madax-bannaanida, midnimada, xornimada iyo dhul-weynaha Jamhuuriyadda Federaalka Soomaaliya, iyadoo carrabka ku adkaysay in xiriirka labada dal uu ku dhisan yahay deris-wanaag, is-ixtiraam iyo wada-noolaansho nabadeed oo waafaqsan sharciga caalamiga ah iyo heshiisyada gobolka.

Bayaan rasmi ah oo kasoo baxay Xafiiska Ra’iisul Wasaaraha Itoobiya, 6-da Janaayo 2026, ayaa lagu sheegay in Soomaaliya iyo Itoobiya ay wadaagaan taariikh dheer, xuduud , xiriirro dhaqan iyo is-dhexgal bulsho oo qoto dheer, kuwaas oo ku waajibinaya labada dhinac in ay si mas’uuliyad leh uga wada shaqeeyaan ilaalinta nabadda, amniga iyo xasilloonida Geeska Afrika.

Dowladda Itoobiya ayaa caddeysay in iskaashi kasta ama heshiis ay la gasho dhinacyo kale inuusan sinaba uga hor imaanayn Soomaaliya, isla markaana uusan wax u dhimayn madax-bannaanideeda ama midnimadeeda dhuleed, iyadoo si cad u diidday fasiraad kasta oo lid ku ah arrintaas.

Bayaanka ayaa sidoo kale lagu adkeeyay in is-faham la’aanta ama khilaafaadka u dhexeeya dalalka deriska ah lagu xalliyo wadahadal, diblomaasiyad iyo is-tashi joogto ah, iyadoo lagu digay in hadallo ama tallaabooyin kacsan aysan dan u ahayn labada dal iyo guud ahaan gobolka.

Itoobiya ayaa muujisay diyaar garow ay u qabto wadahadal wax-ku-ool ah oo ay la yeelato Dowladda Federaalka Soomaaliya, si loo caddeeyo walaacyada jira, loo xoojiyo xiriirka labada dal, loona ballaariyo iskaashiga dhinacyada danaha wadajirka ah, oo ay ka mid yihiin amniga, horumarinta dhaqaalaha, ganacsiga iyo is-dhexgalka gobolka.

Sidoo kale, Addis Ababa ayaa hoosta ka xariiqday sida ay uga go’an tahay taageeridda hannaanada nabadeed ee gobolka iyo xalalka Afrikaanka ah, iyadoo xustay muhiimadda iskaashiga hay’adaha ay ka mid yihiin Urur-Goboleedka IGAD, Midowga Afrika, iyo madallo kale oo caalami ah oo lagu xoojinayo xasilloonida iyo horumarka Geeska Afrika.

Dowladda Itoobiya ayaa ugu dambayn ugu baaqday dhammaan dhinacyada inay muujiyaan dulqaad iyo xikmad, isla markaana mudnaanta siiyaan wadahadalka halkii ay ka ahaan lahayd iska-horimaad, iyadoo ku nuuxnuuxsatay in Soomaaliya nabad ah, xasilloon oo horumaraysa ay dan u tahay Itoobiya, Geeska Afrika iyo qaaradda Afrika guud ahaan.

Gunaanadkii bayaanka, Itoobiya waxay mar kale ballanqaadday inay la shaqaynayso Soomaaliya iyadoo ku salaynaysa is-ixtiraam, mas’uuliyad wadaag iyo mustaqbal mideysan, iyadoo rajaynaysa in xiriirka labada dal uu sii kobco jawi ku dhisan kalsooni, is-faham iyo iskaashi.