JABUUTI, April 01 (Dawan ) – Dowladda Jabuuti iyo Bangiga Adduunka ayaa Talaadadii saxiixay heshiis iskaashi oo lagu xoojinayo helitaanka biyaha la cabo iyo la tacaalidda abaaraha, sida ay soo warisay wakaaladda wararka dowladda Jabuuti.
Heshiiska oo lagu saxiixay magaalada Jabuuti ayaa waxaa ku jira maalgelin dhan 6.5 bilyan oo faran Jabuuti ah (qiyaastii $36.5 milyan), si loo taageero mashaariic muhiim ah oo la xiriira kaabayaasha biyaha iyo adeegyada bulshada.
Mas’uuliyiinta ayaa sheegay in qorshuhu yahay in la gaarsiiyo heerka helitaanka biyaha nadiifka ah 98% marka la gaaro sanadka 2030, iyadoo dalka uu si joogto ah u wajahayo dhibaatooyin la xiriira biyo yari iyo abaaro.
“Heshiiskan wuxuu ka tarjumayaa dadaalka madaxda dalka ay ugu jiraan in si degdeg ah wax looga qabto caqabadaha biyaha, kuwaas oo ah mudnaan qaran,” ayuu yiri Wasiirka Dhaqaalaha iyo Maaliyadda Jabuuti Ilyaas Muuse Dawaaleh.
Wuxuu intaas ku daray in mashruucan uu waafaqsan yahay siyaasadaha horumarineed ee Madaxweynaha Jabuuti Ismaaciil Cumar Geelle, isla markaana uu xoojinaayo iskaashiga lala leeyahay Bangiga Adduunka ee dhinacyada kaabayaasha iyo adeegyada aasaasiga ah.
