Jabuuti iyo Soomaaliya oo mideynaya xogta Badda

Jabuuti (Dawan)- Jabuuti iyo Soomaaliya ayaa daah-furay hindise wadajir ah oo lagu mideynayo uruurinta iyo maareynta xogta deegaanka badda, si loo xoojiyo ilaalinta nidaamka deegaanka ee Badda Cas iyo Gacanka Cadmeed, sida ay ku warrantay Wakaaladda Wararka Jabuuti (ADI).

Hindisahan oo lagu shaaciyay aqoon-is-weydaarsi heer gobol ah oo toddobaadkan ka furmay magaalada Jabuuti, ayaa ujeeddadiisu tahay in la waafajiyo kaydinta, wadaagga, iyo ka faa’iideysiga xogta deegaanka badda, iyadoo diiradda la saarayo saameynta isa soo taraysa ee isbeddelka cimilada ku yeelanayso marinnada badeed ee istiraatiijiga ah.

Aqoon-is-weydaarsiga waxaa soo qabanqaabiyay Ururka Gobolka ee Ilaalinta Deegaanka Badda Cas iyo Gacanka Cadmeed (PERSGA), oo ay xubin ka yihiin dalalka gobolka, kana mid yihiin Jabuuti iyo Soomaaliya.

“In la mideeyo lana horumariyo xogta deegaanka badda waa aas-aaska go’aanno cilmi ku dhisan, waxayna fududeynaysaa qorsheynta iyo ilaalinta kheyraadka badda,” ayuu yiri Diini Cabdalla Cumar, Xoghayaha Guud ee Wasaaradda Deegaanka iyo Horumarinta Joogtada ah ee Jabuuti.

Mas’uuliyiinta Jabuuti ayaa sheegay in hindisahan uu sidoo kale yahay tallaabo lagu xoojinayo dhismaha awoodda hay’adaha ee Jamhuuriyadda Federaalka Soomaaliya, iyadoo la kobcinayo aqoonta farsamo iyo wada-shaqeynta khubarada labada dal.

Aqoon-is-weydaarsiga waxaa goobjoog ka ahaa Safiirka Soomaaliya ee Jabuuti, Salaad Cali Jeelle, lataliyayaal farsamo oo ka socda wasaaradaha ay khuseyso, iyo khubaro ka tirsan PERSGA, kuwaas oo ka wada hadlay hannaan mideysan oo lagu maamulo xogta badda, si kor loogu qaado ilaalinta iyo adeegsiga waara ee kheyraadka badeed ee gobolka.