Jabuuti (Dawan) – Dowladda Jabuuti ayaa ku dhawaaqday dib-u-habayn lagu sameeyay nidaamka dammaanadda amaahda guryaha, taas oo qayb ka ah dadaallada lagu xoojinayo maaliyadsiinta guryaha iyo u fududeynta qoysaska dakhligoodu hooseeyo inay helaan amaah guri.
Wakaaladda Wararka Jabuuti ayaa werisay in dowladdu meesha ka saartay waxa loo yaqaanay “Dammaanadda Qarsoon” ee la xiriirtay hannaanka guud ee amaahda guryaha. Tallaabadan ayaa ujeedkeedu yahay kordhinta hufnaanta iyo xaqiijinta doorka dowladda ee la wadaagga khatarta bangiyada ganacsiga.
Hannaanka dammaanadda amaahda guryaha ayaa markii hore la bilaabay bishii Juun 2023, iyadoo loo marayo Sanduuqa Dammaanadda Jabuuti (FOGAD), balse waxa uu wajahay caqabado hawlgal iyo farsamo oo xaddiday waxtarkiisa, sida lagu sheegay dib-u-eegis uu Bangiga Dhexe sameeyay sannadkii hore.
Wasiirka Dhaqaalaha iyo Maaliyadda, Ilyaas Muuse Dawaaleh, oo kulan la qaatay madaxda bangiyada iyo hay’adaha maaliyadeed, ayaa sheegay in dowladdu maanta xaqiijinayso hirgelin furan oo hannaankan ah si loo dhiirrigeliyo amaahda loo qoondeeyo guryaha.
Sidoo kale, dowladdu waxay ku dhawaaqday in la dhimay komishanka barnaamijyada guriyeynta dadweynaha, kaas oo laga dhigay eber boqolkiiba (0%) muddo 12 bilood ah, halka uu markii hore ahaa 0.95%. Tallaabadan ayaa looga golleeyahay in lagu yareeyo kharashka maaliyadsiinta iyo in muwaadiniinta lagu dhiirrigeliyo inay ka faa’iideystaan barnaamijyada guriyeynta.
Cafiskan ayaa khuseeya mashaariicda ay kormeeraan Wakaaladda Dib-u-cusboonaysiinta Magaalada iyo Guriyeynta Bulshada (ARULoS) iyo Shirkadda Horumarinta Dhulka iyo Guryaha (SIAF).
