Baydhabo 17 December 2025 (Dawan)- Dowlad-goboleedka Koonfur Galbeed ayaa si rasmi ah u shaaciyay in uusan ka qeyb-galin doonin tartanka kubadda cagta ee dowlad-goboleedyada Soomaaliya iyo Gobolka Banaadir, kaddib markii la xallin la waayay tabashooyin ay sheegeen inay ka qabaan habsami u socodka tartanka.
Wasaaradda Dhallinyarada, Ciyaaraha iyo Xiriirka Kubadda Cagta ee Koonfur Galbeed ayaa sheegtay in go’aankan uu salka ku hayo dhibaatooyin hore oo loogu geystay ciyaartooyda , kuwaas oo aan weli si caddaalad ah loo xallin, iyo waliba waqtiyada loo asteeyay qabsoomidda tartanka oo ay ku tilmaameen kuwo aan ku habboonayn.
Mas’uuliyiinta Koonfur Galbeed ayaa xusay shaqaaqooyin ka dhacay tartankii ugu dambeeyay ee la qabtay sanadkii 2024, markaas oo qaar ka mid ah ciyaartooyda Koonfur Galbeed ay sheegeen in ay dhaawacyo kala kulmeen taageerayaal ay ku eedeeyeen in ay ka soo jeedeen Galmudug, kaddib ciyaar kala kulmeen guuldarro, taas oo sababtay inay sii ciyaaraan tartanka iyo kulankii ay la lahaayeen Hirshabeelle.
