Madaxweyne Xasan: “Dhul-boobka Israa’iil waa maya, waa khad cas”

Laascaanood (Dawan) – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa si kulul u cambaareeyay waxa uu ku tilmaamay “dhul-boobka Israa’iil”, isaga oo caddeeyay in arrintaasi tahay khad cas oo aan marnaba laga gudbi karin, isla markaana aysan waafaqsanayn danaha Qaranka Soomaaliyeed iyo xasilloonida guud ee gobolka.

Madaxweynaha oo ka hadlayay munaasabadda caleema-saarka Maamulka Waqooyi Bari Soomaaliya ayaa sheegay in aqoonsiga ama taageeridda tallaabooyinka Israa’iil aysan ahayn dano Qaran, isla markaana aysan wax faa’iido ah u lahayn masiirka dhulka ay Soomaalidu ku nooshahay, gaar ahaan gobollada waqooyi.

“Dhul-boobka Israa’iil waa maya. Waa khad cas. Ma aha danteenna, mana aha danta geyigan aan ku nool nahay,” ayuu yiri Madaxweyne Xasan Sheekh Maxamuud, isagoo si cad u muujiyay mowqifka Dowladda Federaalka.

Madaxweyne Xasan Sheekh Maxamuud ayaa maanta oo Sabti ah, xafladda caleema-saarka Maamulka Waqooyi Bari Soomaaliya ee ka dhacday Laascaanood, ka sheegay in waxa uu ku tilmaamay “dhul-boobka Israa’iil”, isaga oo caddeeyay in arrintaasi tahay khad cas oo aan marnaba laga gudbi karin.

Madaxweynaha ayaa sidoo kale tilmaamay in Ra’iisul Wasaaraha Israa’iil, Benjamin Netanyahu, uu ku jiro go’doon siyaasadeed oo caalami ah, isaga oo xusay in Soomaaliya aysan marnaba aqbali doonin in qayb ka mid ah shacabka Soomaaliyeed lagu xiro ama lagu daro go’doon noocaas ah.

“Kama yeelayno in shacabkeenna Soomaaliyeed loo geliyo go’doon la mid ah kan uu ku jiro Netanyahu. Aqoonsiga arrintaasna marnaba ma aqbalayno" ayuu hadalkiisa ku daray.

Hadalka Madaxweynaha ayaa ku soo beegmaya xilli ay Dowladda Federaalka Soomaaliya marar badan ku celisay mowqifkeeda adag ee ku aaddan difaaca madaxbannaanida, midnimada dhuleed, iyo in go’aamada masiiriga ah ee dalka lagu saleeyo danaha shacabka Soomaaliyeed, kana madaxbannaan cadaadis dibadeed.