Laascaanood (Dawan)– Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa sheegay in sii-daynta iyo is-weydaarsiga maxaabiista ku kala xiran dhinacyada Somaliland iyo Waqooyi Bari Soomaaliya ay tahay mudnaanta koowaad ee Dowladda Federaalka, isagoo ku tilmaamay arrintaas furaha dhismaha kalsoonida iyo hirgelinta nabad waarta.
Madaxweynaha oo ka hadlayay munaasabadda caleema-saarka Madaxweynaha iyo Madaxweyne-ku-xigeenka Waqooyi Bari Soomaaliya, oo maanta ka dhacday magaalada Laascaanood, ayaa xusay in aysan jirin wax cudurdaar ah oo lagu difaaci karo xirnaanta dhalinyaro Soomaaliyeed sababo la xiriira khilaafaad siyaasadeed oo qaldamay.
“Waxaan idinku garab istaagaynaa sii-wadidda nabadda iyo dib-u-heshiisiinta, gaar ahaan is-weydaarsiga maxaabiista labada dhinac. Xorriyadda wiilasha Soomaaliyeed meel kasta oo ay ku xiran yihiin cudurdaar looma hayo.” ayuu yiri Madaxweyne Xasan Sheekh Maxamuud.
