Maraykanka oo isbeddel ku sameeyay hoggaanka diblomaasiyadda ee Soomaaliya

Soomaaliya, 15 Janaayo 2026 (Dawan) — Justin Davis ayaa si rasmi ah ula wareegay xilka Ergeyga Kumeel-gaarka ah ee Safaaradda Mareykanka ee Muqdisho, isagoo beddelaya safiirkii hore Richard H. Riley, sida ay ku dhawaaqday safaaraddu maanta oo Khamiist ah.

Tallaabadan ayaa ku soo aadaysa xilli Washington ay dib u eegis ballaaran ku sameynayso qorshaheeda milatari iyo kuwa bini-aadantinimo ee Geeska Afrika.

Magacaabista Davis ayaa qayb ka ah qorshaha maamulka Madaxweyne Donald Trump ee lagu xoojinayo mudnaanta siyaasadda “America First” , taas oo qeyb ka ah dib-u-habeyn lagu sameynayo matalaadda Mareykanka ee dibadda.

Richard H. Riley, oo xilka hayay tan iyo bartamihii 2024, ayaa ka mid noqday ku dhowaad 30 diblomaasi oo dib loogu yeeray si howlahooda loo qiimeeyo isla markaana la xaqiijiyo qorshaha cusub ee siyaasadda diblomaasiyadeed ee Mareykanka.

Justin Davis, oo horay u ahaa ku-xigeenka madaxa ergada Mareykanka ee Soomaaliya tan iyo Sebtember 2025, ayaa loo igmaay inuu qabto hoggaanka diblomaasiyadda Washington ee Soomaaliya, isagoo xaqiijin doona joogteynta xiriirka diblomaasiyadeed iyo horumarinta danaha Mareykanka ee dalka.

Arrintan ayaa ku soo beegmaysa xilli xasaasi ah oo ay Soomaaliya isku diyaarinayso doorashooyin, iyada oo sidoo kale uu dalku uu dagaal kula jiro kooxaha hubeysan ee Al-Shabaab iyo Daacish. Mareykanka ayaa weli ah taageeraha ugu weyn ee dhinaca amniga, gaar ahaan taageerada ciidamada sida gaarka ah u tababaran ee Danab, kuwaas oo qeyb wayn ka qaata howlgallada ka dhanka ah kooxaha kasoo horjeeda dowladda.