Maxaa xilligan ku soo beegay booqashada Madaxweyne Xasan Sheekh ee Jabuuti?

Jabuuti, 11 Maarso 2026 (Dawan) – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa Arbacadan maanta ah gaaray dalka Jabuuti, halkaas oo uu ka bilaabay booqasho heer sare ah oo looga golleeyahay xoojinta amniga gobolka iyo iskaashiga dhaqaale, sida ay xaqiijisay Madaxtooyada Soomaaliya.

Madaxweynaha iyo wafdigiisa waxaa garoonka diyaaradaha ee Jabuuti si diirran ugu soo dhoweeyay Wasiirka Arrimaha Dibadda Jabuuti, Cabdulqaadir Xuseen Cumar.

Madaxweyne Xasan Sheekh waxaa socdaalkan ku weheliya xubno ka tirsan golihiisa wasiirrada, oo ay ka mid yihiin Cabdulqaadir Maxamed Nuur, Wasiirka Dekedaha iyo Gaadiidka Badda, iyo Maxamed Faarax Nuux, Wasiirka Gaadiidka iyo Duulista Hawada.

Madaxweynaha ayaa lagu wadaa inuu wada-hadallo laba geesood ah la yeesho dhiggiisa dalka Jabuuti, Madaxweyne Ismaaciil Cumar Geelle. Sida lagu sheegay qoraal ka soo baxay Madaxtooyada, wada-hadallada labada hoggaamiye ayaa diiradda lagu saari doonaa xaaladda guud ee Geeska Afrika, gaar ahaan xasilloonida siyaasadeed, dadaallada wadajirka ah ee lagula dagaallamayo Al-Shabaab, iyo xoojinta xiriirka taariikhiga ah ee ka dhexeeya labada dal ee dariska ah.

Booqashadan ayaa ku soo beegmaysa xilli xasaasi ah oo uu gobolku marayo, iyadoo labada hoggaamiye ay ka arrinsanayaan isbeddellada dhanka amniga ee howlgalka AUSSOM, oo Jabuuti ay ka mid tahay dalalka ciidamada ka qayb geliya.