Maxay Soomaaliya uga dhigantahay xubinimada Golaha Amniga ee Midowga Afrika?

Soomaaliya, 12 Febraayo 2026 (Dawan)- Madaxweyne Xasan Sheekh Maxamuud ayaa Arbacadii sheegay in doorashada Soomaaliya ee Golaha Nabadda iyo Amniga ee Midowga Afrika (AUPSC) inay si cad uga turjumayso horumarka gudaha ee dalka iyo dib ugu soo laabashadiisa fagaaraha caalamka.

Midowga Afrika ayaa Soomaaliya u doortay xubinnimada golaha muddo laba sano ah oo u dhexeysa 2026 illaa 2028.

Madaxtooyada ayaa arrintan ku tilmaantay “guul taariikhi ah” oo u soo hoyatay diblomaasiyadda qaranka. “Markii hore waxaan xubin ka noqonay Golaha Ammaanka ee Qaramada Midoobay, maantana waxaan fadhinnaa Golaha Nabadda iyo Amniga ee Afrika,” ayuu Madaxweyne Xasan Sheekh ku yiri bayaan uu soo saaray. “Kalsoonida iyo taageerada ay Soomaaliya ka heshay dalalka xubnaha ka ah Midowga Afrika waxay marag u tahay isbeddelka wanaagsan ee ka socda dalka iyo xoojinta xiriirrada iskaashi.”

Madaxweynaha ayaa ku nuuxnuuxsaday in kursigan uu astaan u yahay “soo kabashada diblomaasiyadeed” ee Soomaaliya iyo ka gudubka sawirkii hore ee lagu sifeyn jiray colaadaha, loona gudbayo marxalad ay ka mid noqoneyso dalalka door firfircoon ka qaata maareynta amniga qaaradda.

Waxa uu sidoo kale ammaanay Wasaaradda Arrimaha Dibadda, isaga oo xusay dadaallada joogtada ah ee ay ku bixisay dib u dhiska doorka hoggaamineed ee Soomaaliya ku dhex leedahay Afrika.

Muddo tobanaan sano ah, Soomaaliya waxay martigelinaysay hawlgallo nabad-ilaalin ah oo uu Midowga Afrika ka waday dalka. Si kastaba ha ahaatee, Madaxweynaha ayaa doorashadan ku tilmaamay mid wax ka beddelaysa maqaamka Soomaaliya, isaga oo xusay in dalka uu hadda door ku leeyahay go’aan-qaadashada isla hay’addii hore uga shaqaynaysay xasillinta gudaha.

Ugu dambayn, Madaxweyne Xasan Sheekh ayaa u mahadceliyay dowladaha xubnaha ka ah Midowga Afrika ee u codeeyay Soomaaliya, isaga oo sheegay in guushan ay ka turjumayso “aragti mideysan oo ku aaddan Afrika nabad ah, xasilloon, isla markaana barwaaqo ah.”