Muqdisho (Dawan)- Wasiirka Ganacsiga iyo Warshadaha Xukuumadda Federaalka Soomaaliya, Jamaal Maxamed Xasan, ayaa sheegay in dowladda ay diyaarinayso madal dijitaal ah oo u oggolaanaysa shacabka inay si maalinle ah ula socdaan isbeddelka sicirka maciishada iyo shidaalka gudaha dalka iyo suuqyada caalamka.
Wasiirka ayaa arrintan ka sheegay wareysi gaar ah oo uu siiyay Telefishinka Qaranka Soomaaliyeed maalintii Isniinta, isaga oo faahfaahin ka bixiyay dadaallada dowladda ee lagu xoojinayo daahfurnaanta suuqyada iyo ilaalinta macaamiisha, xilli uu jiro sare u kac ku yimid qiimaha nolosha.
Jamaal ayaa tilmaamay in madashan ay bixin doonto xog joogto ah oo ku saabsan qiimaha badeecadaha muhiimka ah iyo shidaalka, taasoo u sahlaysa shacabka inay fahmaan isbeddellada ku yimaada nolosha maalinlaha ah isla markaana ay qaataan go’aanno xog ogaal ah.
Wuxuu sidoo kale xusay in sicirka shidaalka Soomaaliya uu si toos ah ugu xiran yahay suuqyada caalamka, isla markaana aan dalka laga goyn karin saameyntaasi. Si kastaba, wuxuu carrabka ku adkeeyay in dowladda ay ka shaqeynayso in la xakameeyo kordhinta aan macquulka ahayn ee qiimaha gudaha.
“Sicirka shidaalka wuxuu ku xiran yahay suuqyada caalamka, Soomaaliya kama go’na arrintaas. Waxa aan xakameyn karno waa in aan shacabka lagu kordhin qiimo aan cadaalad ahayn,” ayuu yiri wasiirku.
