Maxkamadda Sare oo ansixisay natiijada doorashada Golaha Deegaanka Banaadir

Muqdisho (Dawan) – Maxkamadda Sare ee Jamhuuriyadda Federaalka Soomaaliya ayaa si kama dambays ah u ansixisay natiijada doorashada golayaasha deegaanka ee gobolka Banaadir, taas oo la qabtay 25-kii Diseembar 2025, kaddib dacwado la xiriiray habraaca iyo natiijada doorashada.

Go’aanka maxkamadda ayaa yimid kaddib markii ay dib u eegis ku samaysay codsi uu u gudbiyay Guddiga Madaxa-bannaan ee Doorashooyinka Qaranka iyo Soohdimaha, oo la xiriiray doorashada, iyadoo ugu dambayn xaqiijisay in natiijadii uu hore u shaaciyay guddigu ay waafaqsan tahay sharciga dalka.

Maxkamadda Sare ayaa sheegtay in doorashada loo maray hab sharci ah, isla markaana aan la helin wax caddayn ah oo wax ka beddeli kara natiijada doorashada golayaasha deegaanka ee gobolka Banaadir.

Doorashadan oo ahayd mid muhiim u ah maamulka caasimadda ayaa lagu doortay xubnaha golayaasha deegaanka ee degmooyinka gobolka Banaadir, kuwaas oo 16 degmo lagu soo koobay, iyadoo ay ka qayb galeen ururo siyaasadeed iyo musharraxiin kala duwan.

Guddiga Doorashooyinka Qaranka ayaa hore u shaaciyay natiijada doorashada, taas oo markii dambe ay maxkamaddu u aqoonsatay mid kama dambays ah, taas oo meesha ka saaraysa muran kasta oo laga keeni karo doorashada.

Go’aankan ayaa la filayaa in uu xoojiyo hannaanka dimuqraadiyadeed iyo kalsoonida lagu qabo doorashooyinka dalka, gaar ahaan heerka dowlad-hoose ee caasimadda Muqdisho.