Ganacsatada Jabuuti iyo dowladda oo iska kaashanaya xasiloonida suuqa

Jabuuti (Dawan ) – Ganacsatada iyo dowladda Jamhuuriyadda Jabuuti ayaa isku raacay inay xoojiyaan iskaashiga si loo ilaaliyo xasiloonida suuqa gudaha iyo awoodda wax iibsiga ee dadweynaha, kaddib kulan muhiim ah oo lagu qabtay Rugta Ganacsiga Jabuuti.

Kulankan oo uu shir guddoomiyay Wasiirka Ganacsiga iyo Dalxiiska, Maxamed Warsame Diiriye, ayaa diiradda lagu saaray xaaladda suuqyada gudaha iyo saameynta ay xaaladaha Bariga Dhexe ku leeyihiin soo dejinta alaabta muhiimka ah.

Waxaa kulanka ka qayb galay Guddoomiyaha Rugta Ganacsiga Jabuuti, Yuusuf Muuse Dawaale, iyo wakiillo ka socday bahda ganacsatada, iyadoo doodaha lagu muujiyay muhiimadda iskaashi dhow oo u dhexeeya dowladda iyo ganacsatada si loo xakameeyo kororka qiimaha loona hubiyo helitaanka alaabta daruuriga ah.

Xukuumadda Jabuuti ayaa sheegtay inay si dhow ula socon doonto xaaladda suuqyada, isla markaana ay qaadi doonto tallaabooyin ka hortag ah si looga fogaado wax kasta oo saameyn ku yeelan kara qiimaha iyo sahayda alaabta.

Guddoomiyaha Rugta Ganacsiga, Yuusuf Muuse Dawaale, ayaa ku dhawaaqay in la sameeyay guddi gaar ah oo ka shaqeyn doona isku dubbaridka wada shaqaynta dowladda iyo ganacsatada. Waxa uu ugu baaqay ganacsatada inay xoojiyaan kaydka alaabta muhiimka ah, kordhiyaan soo dejinta, isla markaana ay adkeeyaan kormeerka si looga hortago mala-awaalka suuqa.

Dhankiisa, Wasiirka Ganacsiga Maxamed Warsame Diiriye ayaa sheegay in kulankan uu qayb ka yahay dadaallada dowladda ee lagu ilaalinayo awoodda wax iibsiga ee muwaadiniinta, isagoo xusay in qiimaha ay dejisay wasaaraddu uu yahay mid loogu talagalay xasilinta suuqa.

Mas’uuliyiintu waxay sidoo kale xuseen in Jabuuti ay leedahay kayd ku filan oo dabooli kara baahida gudaha muddo bilo ah, iyagoo ku booriyay ganacsatada inay si adag u ilaaliyaan qiimaha rasmiga ah isla markaana ay ka fogaadaan wax kasta oo keeni kara koror aan la sharciyeyn.

Ganacsatada ka qayb gashay kulanka ayaa sheegay inay diyaar u yihiin inay qaataan mas’uuliyadda ka saaran ilaalinta xasiloonida suuqa, isla markaana ay la shaqeeyaan dowladda si loo yareeyo culeyska saameynaya bulshada.