Muxuu yahay Barnaamijka Haleel ee fudueynaya gudashada Cumrada?

Soomaaliya (Dawan) — Sanad kasta, malaayiin Muslimiin ah ayaa u safra Xaramka si ay u gutaan Cumrada. Axadii, 80 qof oo Soomaali ah ayaa ku biiray barnaamij gaar ah oo u oggolaanaya dadka daneenayaan in ay si aayar u bixiyaan kharashka Cumrada.

Barnaamijkan, oo loo yaqaan Haleel, waxaa iska kaashaday Premier Bank iyo HUNSO, isagoo bixiya qorshe “u safar hadda, oo gadaal ka bixi” si loo daboolo kharashka Cumrada.

Barnaamijka Haleel wuxuu sannado badan u suurageliyay dad badan oo Soomaaliyeed inay ka qeyb galaan Cumrada iyagoo daneenayaan in ay si aayar u bixiyaan kharashka oo dhan.

“Dallada iyo Bankigu waxay is tusiyeen baahida ka jirta adeegyada Xajka iyo Cumrada, iyadoo dadka doonaya in ay si aayar u bixiyaan kharashka oo dhan,” ayuu yiri Axmed Bashiir Cusmaan, Maamulaha adeega Haleel.

Xujeydan oo Axaddii laga sagootiyey terminal-ka cusub ee Arimas CIP, ayaa kulan afur iyo sagootin ah loogu qabtay mu’tamiriintii ugu dambeysay ee sanadkan u ambabaxaya gudashada cibaadada Cumrada.

Barnaamijkan waxaa la socda shuruudo gaar ah oo ay tahay in qof walba uu buuxiyo si uu uga faa’iideysto adeegga.

“Banki ahaan waxaan dhiirrigelineynaa hal-abuurka ay daladu la timid shan sano kahor, iyadoo dadka danyarta ah ay bixiyaan 30% hore, inta ka hartayna 12 bilood gudaheed sanadka ku bixiyaan,” ayuu yiri Cabdirashakur Afrax, Madaxa Ganacsiga ee Premier Bank.

Tan iyo markii la bilaabay 2019-kii, Haleel wuxuu u suurageliyay in ka badan 2,000 qof oo Soomaali ah inay gutaan riyooyinkooda ruuxiga ah iyagoo si aayar u bixiyaan kharashka Cumrada iyo Xajka.. Barnaamijku wuxuu sii wadaa inuu ku fido dalka oo dhan, isagoo bixiya adeeg bulsho oo faa’iido la’aan ah.

“Waxaan u mahadcelinayaa dadkii hirgaliyay adeegan cusub, dalka adeegyada aad u dhib badan leh, adeeg sidan u wanaagsan in la helo waa lama huraan, waxaana rajeynaynaa in uu sii jiro mustaqbalka,” ayuu yiri Maxamed Xuseen, ka faa’iideystaha dhawaan.

Barnaamijka Haleel wuxuu noqday adeeg sii fidaya oo bulshada Soomaaliyeed ka taageeraya inay gutaan waajibaadkooda ruuxiga ah, isla markaana dhiirrigeliya helitaanka adeegyo dhaqaale oo fudud iyo wadajirka bulshada.