Puntland oo soo bandhigtay dagaallamayaal ajaanib ah

Soomaaliya, 17 Janaayo 2026 ( Dawan) — Ciidamada ammaanka ee dowlad goboleedka Puntland ayaa intii uu socday hawlgal ballaaran oo ka dhan ah kooxda Daacish, gacanta ku dhigay dagaallamayaal ajaaniib ah oo ku sugnaa buuraha Cal-Miskaad, sida ay sheegeen mas’uuliyiinta gobolka maalinta oo Sabti ah.

Xafiiska Hawlgalada La-dagaallanka Argagixisada Puntland (PCO) ayaa sheegay in xubnaha lasoo bandhigay ay ka garab dagaalamayeen kooxda Daacish, ayna ku jiraan muwaadiniin u dhashay dalalka Turkiga, Sacuudi Carabiya, Marooko, Itoobiya, Yemen, iyo Tansaaniya. xafiiska ayaa sidoo kale soo saaray sawirro iyo liis magacyada dadka la qabtay.

Hawlgalkan oo qayb ka ah olole milateri oo ballaaran oo loogu magac daray Hawlgalka Hilaac, kaas oo lbilaabaymay dabayaaqadii bishii Noofembar 2024 si looga saaro dagaallamayaasha Daacish fariisimaha ay ku leeyihiin buuraha gobolka Bari, ayaa lagu sheegay in uu marayo marxaladihiisii u dambeeyay.

In kasta oo mas’uuliyiintu aysan bixin tiro sax ah, sawirrada la soo bandhigay ayaa muujinaya in la qabtay inta u dhaxaysa 30 ilaa 50 dagaallame oo ajaaniib ah. “Ciidankeena geesiyaasha ah ee Puntland, iyagoo taageero ka helaya Imaaraadka Carabta iyo taliska AFRICOM, waxay kaga adkaadeen kooxda Daacish gudaha Cal-Miskaad,” ayaa lagu yiri bayaan ka soo baxay xafiiska. Maamulka Puntland ayaa sheegay in ciidamadoodu ay nadiifiyeen ku dhawaad 98% silsiladda buuraha Cal-Miskaad, ayna hawlgalladu sii socon doonaan ilaa inta laga ciribtirayo haraadiga kooxda ee ku dhuumanaya buuraha Golis.