Tuulo loogu magac daray SOMTURK oo laga hirgeliyay Shabeellaha Hoose

Soomaaliya, 17 Febraayo 2026 (Dawan)- Dowladda Soomaaliya ayaa maanta xarigga ka jartay mashruuc cusub oo guryo loogu dhisay dadka deegaannada Sabiid iyo Caanoole ee gobolka Shabeellaha Hoose. Mashruucan ayaa loogu talagalay in dib u dejin loogu sameeyo qoysaskii ku barakacay dagaalladii ka dhacay deegaanka.

Guryahan cusub ayaa loo bixiyay Tuulada SOMTURK, waxaana mas’uuliyiintu shegeen inay iska kaashadeen Dowladda Federaalka Soomaaliya iyo Dowladda Turkiga.

Munaasabadda lagu daahfurayay laguna wareejinayay guryaha dadka deegaanka waxaa ka hadlay Wasiirka Gaashaandhigga, Axmed Macallin Fiqi, iyo Wasiirka Arrimaha Gudaha, Federaalka iyo Dib-u-heshiisiinta, Cali Yuusuf Cali. Waxay sheegeen in tuuladan ay qayb ka tahay dadaallada ballaaran ee dib loogu soo celinayo noloshii caadiga ahayd ee dadka rayidka ah ee deegaannada dhowaan laga saaray Al-Shabaab.

“Qorshaheennu waa in guusha milateri ay la socoto adeegyada rayidka,” ayuu yiri Wasiir Cali Xoosh

Sida uu wasiirku sheegay, mashruucan wuxuu bixinayaa guryo qiimo jaban oo ka kooban laba qol, musqul iyo deyr, kuwaas oo nolosha u sahlaya dadka guryahoodii ku waayay colaadaha.

Sidoo kale, raashiin iyo gargaar kale oo qayb ka ah howlgalka xasilinta ee dowladda ugu talagashay deegaannada ayaa lagu qaybiyey munaasabadda.

“Tani ma aha oo kaliya in dhul la qabsado; waa dib u soo celinta nolosha,” ayuu yiri Fiqi, isaga oo raaciyay “Xoreynta aaggan oo dhacday toddobo bilood ka hor waxaa ku daatay dhiig badan. Maanta waxaan burburkii ay ka tageen Al-Shabaab ku beddelaynaa guryo wanaagsan .”

Mas’uuliyiintu waxay qireen caqabadaha jira, oo ay ka mid tahay biyo yaraan baahsan oo ka dhalatay wabiga oo guray. Waxay sheegeen in qodista ceelal dhaadheer laga dhigi doono mudnaanta koowaad ee wejiga xiga ee barnaamijka xasilinta.

Munaasabadda waxaa goobjoog ka ahaa Taliyaha Ciidanka Xoogga Dalka Soomaaliyeed iyo wakiillo ka socday Hawlgalka Taageerada iyo Xasillinta Midowga Afrika ee Soomaaliya (AUSSOM), gaar ahaan ciidanka Uganda, kuwaas oo gacan ka geystay sugidda amniga aagga.

Dowladda ayaa sidoo kale uga mahadcelisay Turkiga taageerada uu ka geysto tababarka milateri, horumarinta kaabayaasha dhaqaalaha iyo dadaallada xasilinta gobollada.

Sabiid iyo Caanoole ayaa ka mid ahaa deegaannadii ay dowladda ka qabsatay Al-Shabaab sanadkii 2025 intii uu socday howlgalkii loogu magac daray “Duufaanta Aamusan.”