Jigjiga (Dawan)-Dowlad Deegaanka Soomaalida ayaa maalintii Sabtida bilowday dhismaha xarun casri ah oo loogu talagalay nadaafadda iyo sifeynta qashinka, taas oo ku kacaysa 700 oo milyan oo Birr una dhiganta $12.5 milyan lagana dhisayo magaalada Dhagax-buur. Mashruucan, waxaa taageeraya Bangiga Adduunka, waxayna ujeeddadiisu tahay horumarinta caafimaadka dadweynaha, abuurista shaqooyin, iyo taageeridda beeraha deegaanka.
Xaruntan cusub, oo ka kooban warshad sifeynta qashinka dareeraha ah iyo adeegyada nadaafadda, ayaa qayb ka ah hindise qaran oo ballaaran oo loogu talagalay casriyeynta maaraynta qashinka magaalooyinka iyo yareynta khataraha caafimaad ee bulshada.
Xuseen Xaashi Qaasim, Wasiirka Xafiiska Madaxweynaha Deegaanka Soomaalida, iyo Axmed Mirad Layli, Wasiirka Xafiiska Biyaha ee deegaanka, ayaa dhagax-dhigay mashruucan maalintii Sabtida. Masuuliyiinta deegaanka ayaa sheegay in la filayo in warshadda lagu dhammaystiro muddo 18 bilood gudahood, isla markaana lagu bilaabo howlaheeda.
