Tripoli (Dawan)- in ka badan shan kun oo qof ayaa ku dhintay duuftaantii daadka dhalisay ee ku dhuftay Bariga dalka Liibiya, iyada oo ay khasaaraha ugu badan uu ka dhacay magaalada Derna.
Wakaaladda Wararka Liibiya ayaa sheegtay in dhimashadu ay gaareyso 5,300 oo qof, halka dadka la la’yahayna lagu qiyaasay kumanaan.
Saraakiil ka tirsan Hay’adda Laanqeyrta Cas iyo Bisha Cas ayaa sidoo kale sheegay in ilaa 10,000 oo qof la la’yahay ka dib daadadkii xoogana ee ku dhuftay dalkaas.
Muuqaallada iyo sawirada ay baahiyeen Warbaahinta Caalamiga ah iyo Warbaahinta Gudaha ayaa muujiyay burburka soo gaaray guryaha iyo dhismayaal badan oo ku yaalla magaala xeebeedka Derna , iyada oo daadadku baabi’iyeen xaafado badan oo ku yaal magaalada.
Hay’adda Waddooyinka iyo Buundooyinka Liibiya ayaa sheegtay in ay burburtay shan buundo oo isku xirta magaalada Derna.
Qaramada Midoobay ayaa dadaal ku bixineysa sidii gargaar deg-deg ah loo gaarsiin lahaa dadkii ku waxyeelloobay daadada Liibiya.
“Qaramada Midoobay waxay kaashaneysaa saaxibada caalamiga ah iyo hay’adaha maxalliga ah, si gargaar bini aadantinimo loo gaarsiiyo dadka ku sugan goobaha ay dhibaatadu ka jirto” ayuu yiri Stephane Dujarric, af-hayeenka xoghayaha Guud ee Qaramada Midoobay.
Dowladda Tunisia oo deris la ah Liibiya ayaa ku dhawaaqday inay diyaarisay kooxaha gurmadka iyo samatabiixnta kuwaas oo ka qeyb qaadanaya dadaallada wax looga qabanayo dhibaatada ka dhalatay daadadka.
Dowladda Soomaaliya ayaa uga tacsiyeysay dowladda iyo shacabka Liibiya dadkii ku geeriyooday daadadkii ka dhasahy duufaanta ku dhufatay dalkaas.
“Jamhuuriyadda Federaalka Soomaaliya waxey si buuxda u garab taagantahay dowladda aan walaalaha nahay ee Liibiya, kadib duufaantii ku dhufatay dalkaas ee sababatay dhimasho, dhaawac iyo khasaare hantiyadeed oo badan” ayaa lagu yiri bayaan kasoo baxay Wasaaradda Arrimah Dibadda Soomaaliya.
